വടകര: അഞ്ചുലക്ഷം രൂപയുടെ കുഴല്‍പ്പണവുമായി യുവാവ് വടകരയില്‍ പിടിയിലായി. കൊടുവള്ളി പടനിലം ചേനച്ചാംകണ്ടി അബ്ദുള്‍ ഗഫൂറിനെയാണ് (28) വടകര ഡിവൈ.എസ്.പി കെ. സുദര്‍ശനന്റെ നേതൃത്വത്തിലുള്ള സ്‌പെഷല്‍ സ്‌ക്വാഡ് പിടികൂടിയത്. പണം വിതരണം ചെയ്യാനെത്തിയപ്പോള്‍ പുതിയ സ്റ്റാന്‍ഡില്‍ നിന്നാണ് ഇയാളെ കസ്റ്റഡിയിലെടുത്തത്. കൊയിലാണ്ടി വരെ ബൈക്കില്‍ വന്ന ശേഷം വാഹനം അവിടെ നിര്‍ത്തി ബസില്‍ വടകരയിലേക്കു വരികയായിരുന്നു. രണ്ടായിരം രൂപയുടെ നോട്ടുകളാണ് പിടിച്ചെടുത്തത്.
പണം ലഭിക്കേണ്ടവരുടെ പേര് മൊബൈലില്‍ രേഖപ്പെടുത്തിയത് പൊലിസ് കണ്ടെടുത്തു. ഇയാളെ കോടതിയുടെ അനുമതിയോടെ എന്‍ഫോഴ്‌സമെന്റിനു കൈമാറുമെന്നു പൊലിസ് അറിയിച്ചു.