ലഖ്‌നോ: ഉത്തര്‍പ്രദേശിലെ താക്കൂര്‍ ഖഞ്ചില്‍ പ്രത്യേക കമാന്‍ഡോ വിഭാഗവും ഭീകരരും തമ്മില്‍ 12മണിക്കൂര്‍ നീണ്ട ഏറ്റു മുട്ടലിനൊടുവില്‍ ഒരു ഭീകരനെ വധിച്ചു. പിസ്റ്റള്‍, റിവോള്‍വറര്‍, കത്തി തുടങ്ങിയ ആയുധങ്ങളും ഇവിടെ നിന്ന് കണ്ടെടുത്തു. ഐ.എസിന്റെ പതാകയും ഇവിടെ നിന്ന് കണ്ടെടുത്തിട്ടുണ്ട്. രണ്ടു പേരുണ്ടെന്നായിരുന്നു പൊലിസിന്റെ നിഗമനം. എന്നാല്‍ ഒരു മൃതദേഹം മാത്രമാണ് കണ്ടെടുത്തത്.
ഇന്നലെ വൈകീട്ട് മൂന്നുമണിയോടെയാണ് താക്കൂര്‍ഗഞ്ചിലെ വീട്ടില്‍ നിന്ന് പൊലിസുകാര്‍ക്കെതിരെ വെടിവെപ്പുണ്ടായത്. കേന്ദ്രരഹസ്യാന്വേഷണ വിഭാഗത്തിന്റെ മുന്നറിയിപ്പിനെ തുടര്‍ന്ന് പരിശോധന നടത്തുന്നതിനിടെയായിരുന്നു വെടിവെപ്പ്.
മധ്യപ്രദേശില്‍ ഒന്‍പതുപേര്‍ക്ക് പരുക്കേല്‍ക്കാനിടയായ ട്രെയിന്‍ സ്‌ഫോടനത്തിനുപിന്നില്‍ പ്രവര്‍ത്തിച്ച ഭീകരര്‍ കെട്ടിടത്തില്‍ ഒളിച്ചിരിക്കുന്നുണ്ടെന്നായുന്നു രഹസ്യവിവരം.
ഭോപ്പാലില്‍ നിന്ന് ഉജ്ജയ്‌നിയിലേക്ക് പോകുകയായിരുന്ന പാസഞ്ചര്‍ ട്രെയിനിലാണ് സ്‌ഫോടനമുണ്ടായത്. അഞ്ച് സ്ത്രീകള്‍ ഉള്‍പ്പടെ ഒന്‍പതുപേര്‍ക്കാണ് സംഭവത്തില്‍ പരുക്കേറ്റു.
കഴിഞ്ഞ ദിവസം കേന്ദ്ര രഹസ്യാന്വേഷണ വിഭാഗം നല്‍കിയ വിവരത്തെ തുടര്‍ന്ന് നടത്തിയ തീവ്രവാദ ബന്ധം സംശയിക്കുന്ന രണ്ടുപേര്‍ കാന്‍പൂരില്‍ അറസ്റ്റിലായിയിരുന്നു ഇവര്‍ക്കും മധ്യപ്രദേശ് ട്രെയിന്‍ സ്‌ഫോടനത്തിന് പിന്നില്‍ പങ്കുണ്ടെന്നാണ് വിവരം.
മധ്യപ്രദേശിലുണ്ടായ ട്രെയിന്‍ സ്‌ഫോടനത്തിന് പിന്നില്‍ ഭീകരരുടെ സാന്നിധ്യമുണ്ടെന്ന് സംസ്ഥാന പൊലിസ് മേധാവി മകരന്ദ് ദേവാസ്‌കര്‍ വ്യക്തമാക്കി.
സ്‌ഫോടനവുമായി ബന്ധപ്പെട്ട് മധ്യപ്രദേശിലെ പിപ്പരിയയില്‍ മൂന്നുപേര്‍ അറസ്റ്റിലായിട്ടുണ്ടെന്നും അദ്ദേഹം പറഞ്ഞു.