റോം : ചാമ്പ്യന്‍സ് ലീഗ് രണ്ടാം പാദ പോരാട്ടത്തില്‍ നാപ്പോളിയെ ഒന്നിനെതിരെ മൂന്നു ഗോളുകള്‍ക്ക് വീഴ്ത്തി റയല്‍ മാഡ്രിഡും ആഴ്‌സനലിനെ ഒന്നിനെതിരെ അഞ്ചു ഗോളുകള്‍ക്ക് വീഴ്ത്തി ബയണ്‍ മ്യൂണിക്കും ക്വാര്‍ട്ടറില്‍ കടന്നു. ആദ്യപാദത്തിലെ അതേ സ്‌കോറിനാണ് ഇരുടീമുകളും രണ്ടാം പാദത്തിലും തോല്‍വി വഴങ്ങിയത്. നാപ്പോളിക്കെതിരെ ഇരുപാദങ്ങളിലുമായി റയല്‍ 6-2 ന്റെ തകര്‍പ്പന്‍ വിജയമാണ് സ്വന്തമാക്കിയത്.

സ്വന്തം തട്ടകത്തില്‍ നടന്ന പോരാട്ടത്തില്‍ റയലിനെ 2-0 ന് തോല്‍പ്പിച്ചാല്‍ ക്വാര്‍ട്ടറിലേക്ക് മുന്നേറാമെന്ന സ്വപ്നവുമായെത്തിയ നാപ്പോളിയെ നിലവിലെ ചാംപ്യന്‍മാര്‍ ഒന്നിനെതിരെ മൂന്നു ഗോളുകള്‍ക്ക് അടിയറവ് പറയിച്ചു. മത്സരത്തിന്റെ 24 ാം മിനുട്ടില്‍ മെര്‍ട്ടനിസിലൂടെ നാപ്പോളി ലീഡ് എടുത്തെങ്കിലും 51 ാം മിനുട്ടില്‍ റാമോസിലൂടെ റയല്‍ തിരിച്ചടിച്ചു. 57 ാം മിനുട്ടില്‍ റാമോസിന്റെ മറ്റൊരു ഹെഡര്‍ മെര്‍ട്ടനനിസിന്റെ തലയില്‍ തട്ടി ഗോളായതോടെ റയല്‍ ലീഡ് നേടി. ഒടുവില്‍ അല്‍വാരോ മൊറാട്ടയിലൂടെ റയല്‍ ഗോള്‍ പട്ടിക പൂര്‍ത്തിയാക്കി.

അതേസമയം, ആദ്യ പാദത്തില്‍ ബയണിനു മുമ്പില്‍ 5-1 നു മുട്ടുമടക്കിയ ആഴ്‌സനല്‍ രണ്ടാം മത്സരത്തിന്റെ ആദ്യ പകുതിയില്‍ ഒരു ഗോളടിച്ച് വന്‍ തിരിച്ചുവരവ് നടത്തിയെങ്കിലും രക്ഷപ്പെടാനായില്ല. ഇരു പാദങ്ങളിലുമായി 10-2 ന്റെ വമ്പിച്ച പരാജയമാണ് ആഴ്‌സനല്‍ ഏറ്റു വാങ്ങിയത്.