കൊട്ടിയം: കണ്ണനല്ലൂരിലെ കംഫര്‍ട്ട് സ്റ്റേഷന്‍ അടച്ചുപൂട്ടി. കഴിഞ്ഞ രണ്ടാഴ്ചയായി കണ്ണനല്ലൂരിലെ കംഫര്‍ട്ട് സ്റ്റേഷനെ തൃക്കോവില്‍വട്ടം ഗ്രാമപഞ്ചായത്ത് പൂര്‍ണമായും അവഗണിച്ചിരിക്കുകയാണ്. പ്രാഥമിക കൃത്യങ്ങള്‍ക്കായി യാത്രക്കാര്‍ ചുറ്റിത്തിരിയുകയാണ്.
പ്രവര്‍ത്തിച്ചിരുന്നപ്പോള്‍ തന്നെ  വരുമാനത്തില്‍ മാത്രമായിരുന്നു ഇതിന്റെ നടത്തിപ്പുകാരുടെ നോട്ടം. യൂറോപ്യന്‍ ക്ലോസറ്റുകള്‍ ശരിയായി പ്രവര്‍ത്തിക്കുന്നുണ്ടായിരുന്നില്ല. ശുചീകരണ പ്രവര്‍ത്തികളും കൃത്യമായി നടത്താറില്ലെന്ന് യാത്രക്കാരും നാട്ടുകാരും പറയുന്നു. കരാര്‍ എടുക്കുന്നവര്‍ ഇത് കൃത്യമായി പ്രവര്‍ത്തിപ്പിക്കുന്നുണ്ടോയെന്ന് ഗ്രാമപഞ്ചായത്ത് പരിശോധിക്കാറുമില്ല. കണ്ണനല്ലൂരിലെ കംഫര്‍ട്ട് സ്റ്റേഷന്‍ ശരിയായ വിധത്തില്‍ പ്രവര്‍ത്തിക്കാന്‍ ആവശ്യമായ നടപടികള്‍ സ്വീകരിക്കണമെന്ന് നാട്ടുകാര്‍ ആവശ്യപ്പെട്ടു. കംഫര്‍ട്ട് സ്റ്റേഷന്‍ പൂര്‍ണമായി പൂട്ടിയിട്ടതില്‍ നവമി സാംസ്‌കാരിക സമിതി പ്രതിഷേധിച്ചു.