കല്ലമ്പലം: ഭര്‍ത്താവിനൊപ്പം ബൈക്കില്‍ യാത്ര ചെയ്യുകയായിരുന്ന എം.കോം വിദ്യാര്‍ഥിനി കെ.എസ്.ആര്‍.ടി.സി സൂപ്പര്‍ ഫാസ്റ്റ് ബസിടിച്ച് മരിച്ചു. കല്ലമ്പലം കരവാരം ഇടത്തറ പുത്തന്‍ വീട്ടില്‍ രാജീവിന്റെ ഭാര്യ അര്യനായര്‍(23) ആണ് മരിച്ചത്.
ദേശീയപാതയില്‍ നാവായിക്കുളം തട്ടുപാലത്തിന് സമീപം  കഴിഞ്ഞ ദിവസം രാവിലെ ഒന്‍പതുമണിയോടെയായിരുന്നു അപകടം. നിലമേല്‍ എന്‍.എസ്.എസ് കോളജിലെ  ഒന്നാം വര്‍ഷ എം.കോം വിദ്യാര്‍ഥിനിയായ ആര്യയെ ഭര്‍ത്താവ് ബൈക്കില്‍ കോളജിലേക്ക് കൊണ്ടുപോകവേ  എതിര്‍ ദിശയില്‍ വരികയായിരുന്ന  ബസിടിച്ചാണ് അപകടമുണ്ടായത്. ഇടിയുടെ ആഘാതത്തില്‍ ആര്യ ബസിനടിയിലേക്ക് തെറിച്ചു വീണു.
ബസിന്റെ പുറകിലെ ടയര്‍ ആര്യയുടെ ശരീരത്തിലൂടെ കയറിയിറങ്ങുകയായിരുന്നു. ഓടികൂടിയ നാട്ടുകാര്‍ ഇരുവരെയും  അടുത്തുള്ള സ്വകാര്യ ആശുപത്രിയിലെത്തിച്ചെങ്കിലും ആര്യ മരിച്ചു. റോഡരികിലേക്ക് തെറിച്ചുവീണ രാജീവിന് നിസാര പരുക്കുകള്‍ മാത്രമേയുള്ളൂ. മെഡിക്കല്‍ കോളജ് ആശുപത്രിയിലേക്ക് മാറ്റി. ജഗനാഥപിള്ളയുടെയും  വത്സലയുടെയും മകളാണ് അര്യനായര്‍.  ഒന്നര വര്‍ഷം മുമ്പായിരുന്നു ഇവരുടെ വിവാഹം നടന്നത്. പട്ടാളത്തിലായിരുന്ന രാജീവ്  അടുത്തിടെയാണ്  അവധിക്ക് നാട്ടിലെത്തിയത്.