കൊച്ചി: മാനദണ്ഡങ്ങള്‍ പാലിക്കാതെ റോഡ് കുത്തിപ്പൊളിക്കുന്നതിനെതിരേ ഹൈക്കോടതി.
കൊച്ചിയിലെ റോഡുകളുടെ തകര്‍ച്ച പരിഹരിക്കാന്‍ കോടതി ഇടപെടല്‍ ആവശ്യപ്പെട്ടുള്ള ഹരജികള്‍ പരിഗണിക്കവെയായിരുന്നു കോടതി വിമര്‍ശനം ഉന്നയിച്ചത്. ഒരു മാനദണ്ഡവും പാലിക്കാതെ റോഡ് വെട്ടിപ്പൊളിക്കുകയാണെന്ന് കോടതി കുറ്റപ്പെടുത്തി.
വകുപ്പുകള്‍ തമ്മിലുള്ള പ്രശ്‌നങ്ങള്‍ക്ക് ജനം എന്ത് പിഴച്ചെന്ന് ജസ്റ്റിസ് ദേവന്‍ രാമചന്ദ്രന്‍ ചോദിച്ചു.
വാതിലുകള്‍ അടച്ചിട്ടാല്‍ പോലും മുറികളില്‍ പൊടിശല്യമാണെന്നും റോഡുകളുടെ തകരാര്‍ പരിഹരിക്കാത്തതാണ് ഇതിനു കാരണമെന്നും കോടതി വ്യക്തമാക്കി. റോഡുകള്‍ കുത്തിപ്പൊളിക്കുന്നതിലും തകരാറുകള്‍ പരിഹരിക്കുന്നതിലും ഒരു വകുപ്പിനും ശ്രദ്ധയില്ലെന്നും കോടതി വ്യക്തമാക്കി.
ആറുമാസം കൂടുമ്പോള്‍ റോഡ് നന്നാക്കേണ്ടിവരുന്നത് ലോകത്ത് ഒരിടത്തും കാണാനാവില്ല. 365 ദിവസവും മഴ പെയുന്ന സ്ഥലങ്ങള്‍ ലോകത്തുണ്ട്. അവിടുത്തെ റോഡുകള്‍ക്ക് ഒരു കുഴപ്പവും ഇല്ലെന്നും ഹൈക്കോടതി വിമര്‍ശിച്ചു. നഗരസഭയുടെ കീഴിലുള്ള അഞ്ച് സോണുകളിലെയും എക്‌സിക്യൂട്ടീവ് എന്‍ജിനിയര്‍മാരും സബ് എന്‍ജിനിയര്‍മാരും കോടതിയില്‍ നേരിട്ട് ഹാജരായിരുന്നു.