പടിഞ്ഞാറത്തറ: വീട്ടമ്മ തനിച്ചുള്ള സന്ദര്‍ഭം നോക്കി വീട്ടിലെത്തിയ രണ്ടംഗ സംഘം ഒരു ലക്ഷത്തോളം രൂപ കൈക്കലാക്കി സ്ഥലം വിട്ടു.
പടിഞ്ഞാറത്തറ വീട്ടിക്കാമൂല കുത്തിനി കുഞ്ഞബ്ദുല്ല ഹാജിയുടെ വീട്ടിലാണ് ഇന്നലെ ഉച്ചയോടെ സംഭവമുണ്ടായത്. വീട്ടിലുണ്ടായിരുന്ന മൂന്ന് സ്ത്രീകള്‍ അലക്കാനും മറ്റുമായി പുറത്തിങ്ങിയ സമയം നോക്കിയാണ് പടിഞ്ഞാറത്തറ- കല്‍പ്പറ്റ റോഡരികിലെ വീട്ടില്‍ അജ്ഞാതരായ രണ്ട് പേരെത്തിയത്. ഇവര്‍ വീട്ടിലുണ്ടായിരുന്ന കുഞ്ഞബ്ദുല്ല ഹാജിയുടെ ഭാര്യ ഫാത്തിമയെ വീട്ടിനുള്ളിലേക്ക് കയറ്റി വാതിലടച്ച് വീട്ടിനുള്ളിലുണ്ടായിരുന്ന കത്തിയെടുത്ത് കാട്ടി ഭീഷണിപ്പെടുത്തുകയായിരുന്നു.
തുടര്‍ന്ന് ഇവരുടെ കൈയിലുണ്ടായിരുന്നതും അലമാരയില്‍ സൂക്ഷിച്ചിരുന്നതുമായ ഒരുലക്ഷത്തോളം രൂപയും രണ്ട് ഗ്രാമോളം വരുന്ന മോതിരവും കൈവശപ്പെടുത്തി മോഷ്ടാക്കള്‍ രക്ഷപ്പെടുകയായിരുന്നു. വീട്ടമ്മ ബന്ധുക്കളെ വിളിച്ചു വരുത്തി വിവരമറിയിക്കുമ്പോഴേക്ക് മോഷണ സംഘം രക്ഷപ്പെട്ടിരുന്നു. ഏതാനും ദിവസം മുമ്പ് അപരിചിതനായ ഒരാള്‍ വീട്ടിലെത്തിയതായി വീട്ടമ്മ പറയുന്നുണ്ട്. മോഷണവുമായി ഇയാള്‍ക്ക് ബന്ധമുണ്ടാവാമെന്നാണ് പറയപ്പെടുന്നത്. പൊലിസില്‍ വിവരമറിയിച്ചതിനെ തുടര്‍ന്ന് കല്‍പ്പറ്റ ഡി.വൈ.എസ്.പി ഉള്‍പ്പെടെയുള്ള പൊലിസ് ഉദ്യോഗസ്ഥര്‍ സ്ഥലത്തെത്തി പരിശോധന നടത്തി കേസെടുത്തു.