പാറശാല: അനധികൃതമായി പിക് അപ്പ് വാനില്‍ കടത്തി കൊണ്ടു പോയ ഒന്‍പത് ചാക്ക് റേഷന്‍ ഉല്‍പ്പന്നങ്ങള്‍ പൊഴിയൂര്‍ പൊലിസ് പിടിച്ചെടുത്തു. ഇന്നലെ ഉച്ചയോടുകൂടി പൊഴിയൂരിനു സമീപം അമ്പനാവിളയില്‍ റേഷന്‍ കടയില്‍ നിന്നും  ഉല്‍പ്പന്നം വാഹനത്തില്‍ കയറ്റുമ്പോള്‍ നാട്ടുകാര്‍ വിവരം പൊഴിയൂര്‍ പൊലിസില്‍ അറിയിക്കുകയായിരുന്നു. പൊലിസ് വാഹനം പിന്‍തുടര്‍ന്നപ്പോള്‍ അമരവിളയിലുള്ള സ്വകാര്യ വ്യക്തിയുടെ ഗോഡൗണില്‍ വാഹനം ഓടിച്ചുകയറ്റുകയായിരുന്നു. ഇതുമായി ബന്ധപ്പെട്ട് അമരവിള സ്വദേശി ഉമ്മര്‍ഖാനെ (39) പൊലിസ് കസ്റ്റഡിയിലെടുത്തു.
ഇതില്‍ നാല് ചാക്ക് പച്ചരി, രണ്ട് ചാക്ക് ഗോതമ്പ്, മൂന്ന് ചാക്ക് വരവ് അരി എന്നിവയുണ്ടായിരുന്നു. പ്രതിയെ ഇന്നലെ കോടതിയില്‍ ഹാജരാക്കി. റേഷന്‍ ഉല്‍പ്പന്നങ്ങള്‍ നെയ്യാറ്റിന്‍കര ടി.എസ്.ഒയ്ക്ക് കൈമാറുമെന്ന് പൊലിസ് അറിയിച്ചു.