മുക്കം (കോഴിക്കോട്) : കാരശ്ശേരി ഗ്രാമപഞ്ചായത്തിലെ കാരമൂലയില്‍ വവ്വാലുകളെ കൂട്ടത്തോടെ ചത്തനിലയില്‍ കണ്ടെത്തി. ഇന്നലെ രാവിലെയാണ് നാട്ടുകാര്‍ കാരമൂല അങ്ങാടിക്ക് സമീപത്തുള്ള സുബുലുല്‍ ഹുദാ മദ്‌റസയുടെ പരിസരത്ത് വവ്വാലുകളെ ചത്തനിലയില്‍ കണ്ടെത്തിയത്. മൃഗസംരക്ഷണ വകുപ്പും പഞ്ചായത്ത് അധികൃതരും ആരോഗ്യവകുപ്പും സ്ഥലത്തെത്തി വവ്വാലുകളുടെ സാംപിള്‍ ശേഖരിച്ച് പരിശോധനയ്ക്ക് അയച്ചു. ചത്ത വവ്വാലുകളെ തീയിട്ട് നശിപ്പിച്ച ശേഷം സംസ്‌കരിച്ചു. സമീപത്ത് നിരവധി വിദ്യാഭ്യാസ സ്ഥാപനങ്ങളും വീടുകളും സ്ഥിതി ചെയ്യുന്നതിനാല്‍ ജെ.സി.ബി ഉപയോഗിച്ച് കുഴിയെടുത്താണ് വവ്വാലുകളെ സംസ്‌കരിച്ചത്. സമീപ പഞ്ചായത്തായ കൊടിയത്തൂരില്‍ പക്ഷിപ്പനി സ്ഥിരീകരിച്ച സാഹചര്യത്തില്‍ നാട്ടുകാര്‍ വലിയ ആശങ്കയിലാണ്.