പെരുമ്പാവൂര്‍: പെരിയാര്‍വാലി- കുറിച്ചിലക്കോട് കനാലില്‍ വെള്ളമെത്തുന്നില്ലെന്ന് പരാതി. ഇതുമൂലം മലയാറ്റൂര്‍ റോഡിന് സമീപമുള്ള കിണറുകള്‍ വറ്റി വരണ്ടുകൊണ്ടിരിക്കുകയാണ്. ജാതി, വാഴ തുടങ്ങിയ കൃഷികളെല്ലാം ഉണങ്ങി നശിച്ചു. കനാലില്‍ വെള്ളമില്ലാത്തതുകൊണ്ട് കുടിവെള്ളക്ഷാമം രൂക്ഷമാണ്. പ്രദേശവാസികള്‍ക്ക് ലോറിയില്‍ കുടിവെള്ളം എത്തിച്ച് നല്‍കിയാണ് ക്ഷാമം പരിഹരിക്കുന്നത്.
കനാലുകളുടെ അറ്റകുറ്റപ്പണികള്‍ നടത്താത്തതുകൊണ്ടാണ് വെള്ളം തുറന്ന് വിടാത്തതെന്ന് പ്രദേശവാസികള്‍ പറയുന്നു. തൊഴിലുറപ്പുകാരുടെ പണിയില്‍ അപാകതയുള്ളതിനാലാണ് കനാല്‍ ശുചീകരണം തടസപ്പെടുന്നതെന്നാണ് പെരിയാര്‍വാലി അതോറിറ്റിയുടെ ന്യായീകരണം. എന്നാല്‍ ഉദ്യോഗസ്ഥരുടെ സാന്നിധ്യത്തില്‍ ശുചീകരണം നടത്തണമെന്നാണ് നാട്ടുകാരുടെ ആവശ്യം. കനാല്‍ ശുചീകരിച്ച് വെള്ളം തുറന്ന് വിടാന്‍ നടപടിയെടുക്കണമെന്നാവശ്യപ്പെട്ട് പ്രദേശവാസികള്‍ പെരിയാര്‍വാലി എക്‌സിക്യുട്ടീവ് എന്‍ജിനീയര്‍ക്ക് പരാതി നല്‍കി.