ന്യൂഡല്‍ഹി: കോണ്‍ഗ്രസ് വിട്ട് ബി.ജെ.പിയില്‍ ചേര്‍ന്ന ജ്യോതിരാദിത്യ സിന്ധ്യ, തന്നെ കാണാന്‍ ശ്രമിച്ചിരുന്നുവെന്നും എന്നാല്‍ അനുവദിച്ചില്ലെന്നുമുള്ള വാര്‍ത്ത നിഷേധിച്ച് രാഹുല്‍ ഗാന്ധി. ഏതു സമയത്തും കാണാവുന്ന ഏക കോണ്‍ഗ്രസ് നേതാവാണ് താനെന്നും രാഹുല്‍ ഗാന്ധി പറഞ്ഞു.

സിന്ധ്യയ്ക്ക് തന്റെ വീട്ടിലേക്ക് എപ്പോള്‍ വേണമെങ്കിലും വരാമായിരുന്നുവെന്നും രാഹുല്‍ ഗാന്ധി പറഞ്ഞു.

18 വര്‍ഷത്തെ കോണ്‍ഗ്രസ് പ്രവര്‍ത്തന പാരമ്പര്യമുള്ള സിന്ധ്യ, ബുധനാഴ്ച ഉച്ചയോടെയാണ് ബി.ജെ.പിയില്‍ ചേര്‍ന്നത്. മധ്യപ്രദേശ് മുഖ്യമന്ത്രി കമാല്‍ നാഥുമായുള്ള തര്‍ക്കത്തെ തുടര്‍ന്നാണ് ജ്യോതിരാദിത്യ സിന്ധ്യ രാജിവച്ചത്.

രാഹുല്‍ ഗാന്ധിയുമായി സിന്ധ്യ സംസാരിക്കാന്‍ ശ്രമിച്ചിരുന്നുവെന്നും എന്നാല്‍ സാധിച്ചില്ലെന്നുമുള്ള റിപ്പോര്‍ട്ട് പ്രചരിച്ചിരുന്നു. ഇക്കാര്യത്തില്‍ പ്രതികരിക്കുകയായിരുന്നു രാഹുല്‍ ഗാന്ധി.