കോട്ടയം: വനിതാദിനാചരണത്തിന്റെ ഭാഗമായി ജില്ലാ ശുചിത്വ മിഷന്റെ നേതൃത്വത്തില്‍ ജില്ലയിലെ മുനിസിപ്പാലിറ്റികളിലെ സ്വാപ്പ് ഷോപ്പുകളില്‍ നിന്ന് മികച്ചവയെ തിരഞ്ഞെടുക്കുന്നു. മുനിസിപ്പാലിറ്റികളിലെ കുടുംബശ്രീ യൂനിറ്റുകളില്‍ ഇന്നും നാളെയും  പ്രവര്‍ത്തിക്കുന്ന സ്വാപ്പ് ഷോപ്പുകളില്‍ നിന്നാണ് മികച്ച രീതിയില്‍ പ്രവര്‍ത്തിക്കുന്ന സ്വാപ് ഷോപ്പുകളെ തിരഞ്ഞെടുക്കുക. വ്യക്തിക്കോ കുടുംബത്തിനോ ആവശ്യമില്ലാത്ത പുനരുപയോഗക്ഷമമായ വസ്തുക്കളും ഉല്‍പന്നങ്ങളും പൊതുസംവിധാനത്തിലൂടെ മറ്റൊരു വ്യക്തിക്കോ കുടുംബത്തിനോ ഉപയോഗപ്രദമാക്കി മൂല്യമുള്ള വസ്തുക്കള്‍ ആവശ്യക്കാരില്‍ എത്തിക്കുകയാണ് സ്വാപ്പ് ഷോപ്പിന്റെ ലക്ഷ്യം. കളിപ്പാട്ടങ്ങള്‍, സ്‌കൂള്‍ ബാഗുകള്‍, ചെരുപ്പുകള്‍, വസ്ത്രങ്ങള്‍, പാത്രങ്ങള്‍, കുട, മേശ, കസേര, മെത്ത, തലയിണ, ടി.വി, മിക്‌സി, ഇസ്തിരിപ്പെട്ടി, മൊബൈലുകള്‍, കംപ്യൂട്ടറുകള്‍, മൊബൈല്‍ ചാര്‍ജ്ജറുകള്‍ തുടങ്ങിയവ കുടുംബശ്രീ യൂനിറ്റുകള്‍ വഴി പൊതുജനങ്ങള്‍ക്ക് ഷോപ്പുകളില്‍ നല്‍കാം. ആവശ്യക്കാര്‍ക്ക് സ്വാപ്‌ഷോപ്പില്‍ നിന്ന് സാധനങ്ങള്‍ സൗജന്യമായി സ്വന്തമാക്കാം. ഹരിതകേരളം പദ്ധതിയോടനുബന്ധിച്ച് വൈക്കം, പാലാ, കോട്ടയം മുനിസിപ്പാലിറ്റികളില്‍ പ്രവര്‍ത്തനം ആരംഭിച്ച സ്വാപ് ഷോപ്പുകള്‍ ജനശ്രദ്ധ നേടിയിരുന്നു.