കോഴിക്കോട്: വിദേശരാജ്യങ്ങളില്‍ മരണപ്പെടുന്ന പ്രവാസി മലയാളികളുടെ മൃതദേഹങ്ങള്‍ നാട്ടിലെത്തിക്കാനുള്ള ചെലവ് ഇനി നോര്‍ക്കാ റൂട്ട്‌സ് വഹിക്കുമെന്ന സംസ്ഥാന ബജറ്റിലെ പ്രഖ്യാപനം പ്രവാസികള്‍ക്കും കുടുംബങ്ങള്‍ക്കും പ്രതീക്ഷ പകരുന്നത്. എന്നാല്‍ പദ്ധതി എന്ന് പ്രാവര്‍ത്തികമാകുമെന്ന കാര്യത്തിലാണ് ആശങ്ക. ഇക്കാര്യത്തിലാകട്ടെ ബജറ്റിലും ഒരു വരി പരാമര്‍ശമല്ലാതെ വിശദീകരണമില്ല.
ഇതുപോലൊരു പ്രഖ്യാപനം ആദ്യമായല്ല മലയാളികള്‍ കേള്‍ക്കുന്നത്. വിദേശത്ത് മരിക്കുന്ന പ്രവാസികളുടെ മൃതദേഹം സൗജന്യമായി എയര്‍പോര്‍ട്ടില്‍ നിന്ന് വീട്ടിലെത്തിക്കുന്നതിന് പ്രത്യേക ആംബുലന്‍സ് സംവിധാനം യാഥാര്‍ഥ്യമാക്കുമെന്ന് നോര്‍ക്ക റൂട്ട്‌സ് അധികൃതര്‍ മൂന്നു വര്‍ഷം മുന്‍പേ ഉറപ്പ് നല്‍കിയിരുന്നു. ഒരു നടപടിയും ഇതുവരെ ഉണ്ടായില്ല. ഈ പദ്ധതി ഒരു മാസത്തിനകം തുടങ്ങുമെന്നായിരുന്നു അന്ന് നോര്‍ക്ക റൂട്ട്‌സിന്റെ സി.ഇ.ഒ ഹരികൃഷ്ണന്‍ നമ്പൂതിരി പ്രവാസി ഭാരതീയ പുരസ്‌കാര ജേതാവ് അശ്‌റഫ് താമരശ്ശേരിക്ക് ഉറപ്പ് നല്‍കിയിരുന്നത്. കേരളത്തിലെ എല്ലാ വിമാത്താവളങ്ങളിലും ഈ സൗകര്യം ലഭ്യമാക്കുമെന്നും അറിയിച്ചിരുന്നു. എന്നാല്‍ അതു പ്രാവര്‍ത്തികമായില്ല. ഈ സാഹചര്യത്തിലാണ് ധനമന്ത്രി ഡോ. തോമസ് ഐസക് പുതിയ ബജറ്റില്‍ ഈ പദ്ധതി കൂടി പ്രഖ്യാപിച്ചിരിക്കുന്നത്.
വിദേശങ്ങളില്‍ മരണപ്പെടുന്നവരുടെ മൃതദേഹങ്ങളില്‍ എഴുപത് ശതമാനവും നാട്ടിലെത്തുന്നില്ല എന്നാണ് കണക്ക്. വിമാനക്കമ്പനികളുടെ പിടിച്ചുപറിയും രേഖകളുടെ നൂലാമാലകളും മൂലം പ്രിയപ്പെട്ടവരുടെ മുഖം അവസാനമായി ഒരുനോക്കുകാണാന്‍ സാധിക്കാത്ത സ്ഥിതിയാണ് മലയാളികള്‍ക്കുണ്ടാക്കുന്നത്. പ്രവാസി മരണങ്ങളില്‍ അധികവും അപകടം വഴിയാണ്. ഹൃദയാഘാതവും കുഴഞ്ഞുവീണുള്ള മരണങ്ങളുമാണ് തൊട്ടുപിന്നില്‍. 2007ല്‍ മാത്രം യു.എ.ഇയില്‍ ആത്മഹത്യ ചെയ്ത പ്രവാസികള്‍ 118 ആണ്. ഇന്ത്യന്‍ കോണ്‍സുലേറ്റിന്റെ കണക്കാണിത്. അഞ്ചു മാസത്തിനിടെ 236 വിദേശ മലയാളികള്‍ അവിടെ മരിച്ചു.
മരണപ്പെടുന്നവരില്‍ 80 ശതമാനവും 40 വയസില്‍ താഴെയുള്ളവരാണ്. ഏറ്റവും കൂടുതല്‍ മൃതദേഹങ്ങളെത്തുന്നത് യു.എ.ഇയില്‍ നിന്നാണ്.16.1 ശതമാനം. രണ്ടാം സ്ഥാനം സഊദി അറേബ്യക്കാണ്. ഒരാളുടെ മൃതദേഹം നാട്ടിലെത്തിക്കാന്‍ എയര്‍ ഇന്ത്യ ഈടാക്കിയിരുന്നത് 80,000 രൂപ(നാലായിരം ദിര്‍ഹം) യായിരുന്നു. എയര്‍ അറേബ്യ 21,700 രൂപ മാത്രവും. മൃതദേഹം തൂക്കിനോക്കിയായിരുന്നു എയര്‍ ഇന്ത്യ പിടിച്ചുപറി തുടര്‍ന്നിരുന്നത്. ഇതിനെതിരേ പ്രതിഷേധം ശക്തമായപ്പോള്‍ തൂക്കിനോക്കിയുള്ള മൃതദേഹം കൊണ്ടുവരല്‍ അവസാനിപ്പിച്ചിട്ടുണ്ട്. എന്നാല്‍ ഇതും വലിയ ഗുണം ചെയ്യില്ലെന്നാണ് വിലയിരുത്തല്‍.