അബൂദബി: ഏഷ്യന്‍ കപ്പ് ഫുട്‌ബോളിലെ കലാശപ്പോര് ഇന്ന് നടക്കും. ഇന്ന് രാത്രി 7.30ന് അബൂദബി സായിദ് സ്‌പോട്‌സ് സിറ്റി സ്റ്റേഡിയത്തിലെ ഫൈനല്‍ മത്സരത്തില്‍ ജപ്പാന്‍ ഖത്തറിനെ നേരിടും.
ലോകകപ്പ് ഫുട്‌ബോളില്‍ ബെല്‍ജിയമടക്കമുള്ള ടീമുകളെ വിറപ്പിച്ചെത്തിയ ജപ്പാന്‍ അഞ്ചാം കിരീടം നേടാനുറച്ചാണെത്തുന്നത്. 1988ല്‍ ഏഷ്യന്‍ കപ്പില്‍ അരങ്ങേറിയ ജപ്പാന്‍ 1992, 2000, 2004, 2011 വര്‍ഷങ്ങളില്‍ കിരീടം സ്വന്തമാക്കുകയും ചെയ്തിട്ടുണ്ട്. ഗ്രൂപ്പ്ഘട്ടം മുതല്‍ ശക്തരായ സഊദി അറേബ്യ, ഒമാന്‍, ഇറാന്‍ എന്നീ ടീമുകളെ തുരത്തിയാണ് ജപ്പാന്‍ ഫൈനല്‍ ടിക്കറ്റ് ഉറപ്പിച്ചത്. ഈയിടെയായി മികച്ച ഫോമില്‍ കളിക്കുന്ന ജപ്പാന്‍ തികഞ്ഞ ആത്മവിശ്വാസത്തിലാണ്. ഇറാനുമായുള്ള മത്സരത്തില്‍ കടുത്ത എതിരാളികളായിരുന്നിട്ടും എണ്ണം പറഞ്ഞ മൂന്ന് ഗോളിനായിരുന്നു ജപ്പാന്‍ വെന്നിക്കൊടി പാറിച്ചത്. ഖത്തറിന്റെ മുന്നേറ്റ താരങ്ങളായ അല്‍മോസ് അലിയേയും പിടിച്ചുകെട്ടാനായാല്‍ മാത്രമേ ജപ്പാന് ഇന്നത്തെമത്സരം അനായാസമാകൂ.

അതേസമയം, മികച്ച ഫോമിലുള്ള ഖത്തറും കിരീട പ്രതീക്ഷയിലാണ്. ദക്ഷിണകൊറിയ, ഇറാഖ്, സഊദി അറേബ്യ, യു.എ.ഇ എന്നീ ടീമുകളെ എട്ടുനിലയില്‍ പൊട്ടിച്ചാണ് ഖത്തര്‍ ഫൈനലിലേക്ക് യോഗ്യത നേടിയിട്ടുള്ളത്. മികച്ച ഫോമില്‍ കളിക്കുന്ന നിലവിലെ ടോപ്‌സ്‌കോററായ അല്‍മോസ് അലിയിലാണ് ഖത്തറിന്റെ പ്രതീക്ഷ മുഴുവനും. ടൂര്‍ണമെന്റില്‍ ഇതുവരെ എട്ട് ഗോളുകള്‍ നേടിയാണ് അല്‍മോസ് അലി കരുത്ത് തെളിയിച്ചിട്ടുള്ളത്. 1980 ല്‍ ഏഷ്യ കപ്പില്‍ അരങ്ങേറ്റം കുറിച്ച ഖത്തര്‍ ആദ്യമായിട്ടാണ് ഫൈനലില്‍ പ്രവേശിക്കുന്നത്. 2022ല്‍ നടക്കാനിരിക്കുന്ന ലോകകപ്പില്‍ കളിക്കുന്ന ടീമാണെന്ന ഖ്യാതി നിലനിര്‍ത്തുന്ന രീതിയിലായിരുന്നു ഖത്തറിന്റെ പ്രകടനങ്ങള്‍ മുഴുവനും. വ്യക്തമായ ആധിപത്യത്തോടെയും കൃത്യതയോടെയുമായിരുന്നു എല്ലാമത്സരങ്ങളെയും ഖത്തര്‍ നേരിട്ടത്. ഇന്ന് കിരീടം നേടാന്‍ സാധിച്ചാല്‍ ഏഷ്യന്‍ കപ്പില്‍ ഖത്തറിന്റെ പൊന്‍ചരിതം കൂടിയാകും.