കൊച്ചി: എറണാകുളം, ആലപ്പുഴ, കൊല്ലം തുടങ്ങിയ ജില്ലകളില്‍ നിന്നായി പന്ത്രണ്ടോളം ഇരുചക്ര വാഹനങ്ങള്‍ മോഷണം നടത്തിയ പ്രതി പിടിയില്‍. എടവനക്കാട് ചിരട്ടപ്പറമ്പ് വീട്ടില്‍ ജയകുമാറി(38)നെയാണ് എറണാകുളം നോര്‍ത്ത് എസ്.ഐ വിബിന്‍ദാസിന്റെ നേതൃത്വത്തിലുള്ള പൊലിസ് അറസ്റ്റ് ചെയ്തത്.
എറണാകുളം ജില്ലയിലെ വിവിധ സ്ഥലങ്ങളില്‍ നിന്നും നിരവധി ഇരുചക്ര വാഹനങ്ങള്‍ മോഷണം പോയതിനെത്തുടര്‍ന്ന് എറണാകുളം അസിസ്റ്റന്റ് കമ്മിഷണര്‍ ലാല്‍ജിയുടെ നിര്‍ദേശമനുസരിച്ച് നോര്‍ത്ത് സി.ഐ ടി ബി വിജയന്റെ നേതൃത്വത്തില്‍ വിവിധ സ്‌ക്വാഡുകള്‍ രൂപീകരിച്ച് അന്വേഷണം നടത്തിവരികയായിരുന്നു.  എറണാകുളം നോര്‍ത്ത് പൊലീസ് ചൊവ്വാഴ്ച വൈകിട്ട് സ്‌റ്റേഷന്‍ പരിധിയില്‍ പരിശോധന നടത്തിവരവേ മോഷണ വാഹനം ഓടിച്ചുവന്ന പ്രതിയെ അറസ്റ്റ് ചെയ്യുകയായിരുന്നു.