പള്ളിക്കര: സമസ്ത കേരള ജംഇയ്യത്തുല്‍ ഉലമയുടെ പുതിയ പ്രസിഡന്റായി തെരഞ്ഞെടുക്കപ്പെട്ട സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ക്കും സമസ്ത കേരള ഇസ്‌ലാം മത വിദ്യാഭ്യാസബോര്‍ഡ് ജനറല്‍ സെക്രട്ടറിയായി തെരഞ്ഞെടുക്കപ്പെട്ട ശൈഖുന എം.ടി അബ്ദുല്ല മുസ്‌ലിയാര്‍ക്കും സമസ്ത എറണാകുളം ജില്ലാ കമ്മിറ്റിയുടെ നേതൃത്വത്തില്‍ ഇന്ന് പെരിങ്ങാലയില്‍ സ്വീകരണം നല്‍കും. സ്വീകരണത്തിന് മുന്നോടിയായി നടക്കുന്ന പണ്ഡിത സംഗമത്തില്‍ സമസ്തയുടെ സമുന്നതരായ നേതാക്കള്‍ പങ്കെടുക്കുമെന്ന് സ്വാഗതസംഘം ഭാരാവഹികള്‍ വാര്‍ത്താസമ്മേളനത്തില്‍ പറഞ്ഞു. വൈകിട്ട് ഏഴിന് എ ആന്‍ഡ് കെ മെമ്മോറിയല്‍ അല്‍ ബിര്‍റ് ഇസ്‌ലാമിക പ്രീ സ്‌കൂളിന് സമീപം പ്രത്യേകം സജ്ജമാക്കിയ ശംസുല്‍ ഉലമ നഗറിലാണ് സ്വീകരണ സമ്മേളനം നടക്കുന്നത്. സമസ്ത നേതാക്കളായ കുമരംപുത്തൂര്‍ എ.പി മുഹമ്മദ് മുസ്‌ലിയാര്‍, കോട്ടുമല ടി.എം ബാപ്പു മുസ്‌ലിയാര്‍ അനുസ്മരണവും ഇതോടൊപ്പം നടക്കും.
ഉച്ചക്ക് രണ്ടിന് സമസ്ത എറണാകുളം ജില്ലാ പണ്ഡിത സംഗമം എ ആന്‍ഡ് കെ മെമ്മോറിയല്‍ അല്‍-ബിര്‍റ് സ്‌കൂളില്‍ നടക്കും. സമസ്ത ജില്ലാ പ്രസിഡന്റ് ടി.ബി ഉസ്മാന്‍ ഫൈസി അധ്യക്ഷത വഹിക്കും. സമ്മേളനം സമസ്ത അധ്യക്ഷന്‍ സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും. വിദ്യാഭ്യാസ ബോര്‍ഡ് മുഖ്യ കാര്യദര്‍ശി എം.ടി. അബ്ദുല്ല മുസ്‌ലിയാര്‍ മുഖ്യപ്രഭാഷണം നടത്തും.
സമസ്ത കേന്ദ്ര മുശാവറ അംഗം എം.എം. മുഹ്‌യദ്ദീന്‍ മൗലവി അനുസ്മരണ പ്രഭാഷണം നടത്തും. സമസ്ത സെക്രട്ടറി പി.പി. ഉമര്‍ മുസ്‌ലിയാര്‍ കൊയ്യോട്, ജംഇയ്യത്തുല്‍ മുഅല്ലിമീന്‍ സംസ്ഥാന ജനറല്‍ സെക്രട്ടറി ഡോ: ബഹാവുദ്ദീന്‍ കൂരിയാട് നദ്‌വി, സുന്നി മഹല്ല് ഫെഡറേഷന്‍ സംസ്ഥാന ജന. സെക്രട്ടറി ഉമര്‍ ഫൈസി മുക്കം, ദാരിമീസ് അസോസിയേഷന്‍ സംസ്ഥാന പ്രസിഡന്റ് അബ്ദുല്‍ ഗഫൂര്‍ ദാരിമി മുണ്ടക്കുളം, സമസ്ത കേന്ദ്ര മുശാവറ അംഗം ഇ.എസ്.ഹസന്‍ ഫൈസി, വിദ്യാഭ്യാസ ബോര്‍ഡ് മാനേജര്‍ കെ. മോയിന്‍കുട്ടി മാസ്റ്റര്‍, സമസ്ത ഓര്‍ഗനൈസര്‍ ഉമര്‍ മുസ്‌ലിയാര്‍ വയനാട് എന്നിവര്‍ സ്വീകരണ അനുസ്മരണ പണ്ഡിതസംഗമത്തില്‍ പങ്കെടുക്കും.  
സ്വാഗതസംഘം ചെയര്‍മാന്‍ വി.കെ. മുഹമ്മദ് ദാരിമി, ജന. കണ്‍വീനര്‍ പി.കെ. മുഹമ്മദ് ഹാജി പറക്കോട്, ഭാരവാഹികളായ എന്‍.കെ. മുഹമ്മദ് ഫൈസി, അബ്ദുസലാം ഹാജി പെരിങ്ങാല, സിയാദ് ചെമ്പറക്കി എന്നിവര്‍ പത്രസമ്മേളനത്തില്‍ പങ്കെടുത്തു.