ഡെറാഡൂണ്‍: ഉത്തരാഖണ്ഡില്‍ ഒ.എല്‍.എക്‌സിലൂടെ നക്ഷത്ര ആമകളെ വില്‍ക്കാന്‍ ശ്രമിച്ച 19കാരന്‍ അറസ്റ്റില്‍. ഉത്തരാഖണ്ഡിലെ വിശാല്‍ നഗറിലാണ് ഓണ്‍ലൈനിലൂടെ സാധനങ്ങള്‍ വില്‍ക്കുന്ന വെബ്‌സൈറ്റായ ഒ.എല്‍.എക്‌സ് ഡോട് കോമിലൂടെ നക്ഷത്ര ആമകളെ വില്‍ക്കാന്‍ മോഹിത് ഗാര്‍ഗ് എന്നയാള്‍ ശ്രമിച്ചത്. ഇന്ത്യന്‍ നക്ഷത്ര ആമകള്‍ വില്‍ക്കാനുണ്ടെന്ന് കാണിച്ച് ഇയാള്‍ വെബ്‌സൈറ്റില്‍ പരസ്യം നല്‍കുകയായിരുന്നു. മൂന്ന് ആമകളെ ഇയാളുടെ പക്കല്‍ നിന്നും പിടികൂടിയിട്ടുണ്ട്. ആഗോള തലത്തില്‍ വന്‍ മാര്‍ക്കറ്റുളള ഇവയെ കൈവശം വെക്കുന്നത് ഇന്ത്യയില്‍ തടവു ശിക്ഷ ലഭിക്കുന്ന കുറ്റമാണ്. ഇത്തരം സംരക്ഷിത ജീവികളെ വില്‍പ്പന നടത്തുന്ന പരസ്യങ്ങള്‍ നല്‍കുന്നതിനെക്കുറിച്ച് വെബ്‌സൈറ്റിന് മുന്നറിയിപ്പ് നല്‍കിയതായി ഉത്തരാഖണ്ഡ് ചീഫ് ഫോറസ്റ്റ് കണ്‍സര്‍വേറ്റര്‍ പറഞ്ഞു.