വെഞ്ഞാറമൂട്: ഇരങ്ങയില്‍ ഇടപ്പന്‍കോട് ആയിരവില്ലി ക്ഷേത്രത്തിന് ഇരുനൂറ് മീറ്റര്‍ മാറി നെടുമ്പാറ മുകളില്‍ അടിക്കാടിന് തീപിടിച്ചു. ക്ഷേത്രത്തില്‍ ഉത്സവ ചടങ്ങുകള്‍ നടന്നുകൊണ്ടിരിക്കെയാണ് ഇവിടെ തീപിടിത്തമുണ്ടായത്. ഫയര്‍ഫോഴ്‌സ് തക്ക സമയത്ത് എത്തി തീ കെടുത്തിയതിനാല്‍ വന്‍ദുരന്തം ഒഴിവായി.
ഇന്നലെ ഉച്ചയ്ക്ക് രണ്ടു മണിയോടെയാണഴ തീപിടിത്തമുണ്ടായത്. പാറയുടെ സമീപത്തെ അടിക്കാടിനാണു തീപിടിച്ചത്. നാട്ടുകാരുടെ ശ്രദ്ധയില്‍പ്പെട്ട ഉടനെ വെഞ്ഞാറമൂട് ഫയര്‍ഫോഴ്‌സില്‍ വിവരം അറിയിക്കുകയായിരുന്നു. ഫയര്‍ഫോഴ്‌സ് സ്ഥലത്തെത്തി വെള്ളം ഒഴിച്ചും അടിച്ചും തീകെടുത്തുകയായിരുന്നു. ഇവിടെ സന്ദര്‍ശിച്ച ആരോ ഉപേക്ഷിച്ച തീപ്പെട്ടിക്കൊള്ളിയില്‍നിന്നു തീപടര്‍ന്നതാകാമെന്നാണ് ഫയര്‍ഫോഴ്‌സിന്റെ പ്രാഥമിക നിഗമനം.
വെഞ്ഞാറമൂട് ഫയര്‍ഫോഴ്‌സ് യൂനിറ്റിലെ അസി. സ്റ്റേഷന്‍ ഓഫിസര്‍ പി.ആര്‍ അനില്‍കുമാര്‍, ലീഡിങ് ഫയര്‍മാന്‍ അജിത്കുമാര്‍, ഫയര്‍മാന്മാരായ നിശാന്ത്, അനില്‍ രാജ്, സതീശന്‍, ശരത് ഡ്രൈവര്‍ ശിവകുമാര്‍ എന്നിവരുടെ നേതൃത്വത്തിലുള്ള ഫയര്‍ഫോഴ്‌സു സംഘമാണ് തീകെടുത്തിയത്.