കുറ്റ്യാടി : കുറ്റ്യാടി- പേരാമ്പ്ര സംസ്ഥാന പാതയില്‍ കെ.എസ്.ആര്‍.ടി.സി ബസും സ്‌കൂട്ടറും കൂട്ടിയിടിച്ച് പ്ലസ്ടു വിദ്യാര്‍ത്ഥി മരിച്ചു. പാലേരി പാറക്കടവിലെ മലയനര്‍കണ്ടി അബ്ദുറഹീമിന്റെ മകന്‍ അഫ്‌നാന്‍ (16) ആണ് മരിച്ചത്. കൂടെയുണ്ടായിരുന്ന മുഹമ്മദ് കാഞ്ഞിരോളി, റിസ്‌വാന്‍ പാലേരി എന്നിവര്‍ക്കാണ് പരുക്കേറ്റത്. സാരമായ പരുക്കുകളോടെ ഇവരെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.

പാറക്കടവ് പള്ളിക്കു സമീപം വ്യാഴാഴ്ച രാത്രി പത്തോടെയാണ് അപകടം. മറ്റൊരു വാഹനത്തെ മറികടക്കുന്നതിനിടയില്‍ ബസുമായി കൂട്ടിയിടിക്കുകയായിരുന്നു. സ്‌കൂട്ടര്‍ പൂര്‍ണ്ണമായും ബസിനടിയിലായിരുന്നു. നാട്ടുകാരെത്തിയാണ് മൂവരെയും പുറത്തെടുത്തത്.

പരുക്കേറ്റവരെ കുറ്റ്യാടി താലൂക്ക് ആശുപത്രിയില്‍നിന്ന് പ്രാഥമിക ചികിത്സ നല്‍കിയ ശേഷം കോഴിക്കോട് മെഡിക്കല്‍ കോളജില്‍ കൊണ്ടുപോകുമ്പോള്‍ വഴിമധ്യേയാണ് അഫ്‌നാന്‍ മരിച്ചത്. കുറ്റ്യാടിയില്‍ നിന്ന് ട്യൂഷന്‍ ക്ലാസ് കഴിഞ്ഞ് കൂട്ടുകാരോെടാപ്പം വരികയായിരുന്നു.

മൃതദേഹം കോഴിക്കോട് മെഡിക്കല്‍ കോളജില്‍. വടക്കുമ്പാട് എച്ച്.എസ്.എസ് പ്ലസ് ടു വിദ്യാര്‍ഥിയാണ് മരിച്ച അഫ്‌നാന്‍. മാതാവ് ആയിഷ. ഖബറടക്കം ഇന്ന് ഉച്ചക്ക് 3ന് പാറക്കടവ് ജുമാമസ്ജിദ് ഖബര്‍സ്ഥാനില്‍.