കല്‍പ്പറ്റ: പ്രായപൂര്‍ത്തിയാകാത്ത ആദിവാസി പെണ്‍കുട്ടിയെ പീഡിപ്പിച്ചെന്ന കേസില്‍ ഒളിവില്‍ പോയ ഒ.എം ജോര്‍ജിന്റെ പാസ്‌പോര്‍ട്ട് പൊലിസ് പിടിച്ചെടുത്തു. ഇന്നലെ പൊലിസ് ഇയാള്‍ക്കുവേണ്ടി അന്വേഷണം നടത്തിയെങ്കിലും കണ്ടെത്താനാകാത്ത സാഹചര്യത്തിലാണ് ഇയാളുടെ പാസ്‌പോര്‍ട്ട് പിടിച്ചെടുത്തത്.

ഇയാള്‍ക്കെതിരേ പരാതി ഉണ്ടായ ചൊവ്വാഴ്ച ഉച്ചയോടെയാണ് ഒളിവില്‍ പോയത്. ചൊവ്വ ഉച്ചക്ക് 12ഓടെ ഇയാളുടെ സെല്‍ഫോണ്‍ സ്വിച്ച്ഡ് ഓഫ് ആയി. പിന്നീട് ഇതുവരെ പ്രവര്‍ത്തിച്ചിട്ടില്ല. ഇതിനിടെ ഇയാള്‍ പോകാനിടയുള്ള സ്ഥലങ്ങളിലും അയല്‍ സംസ്ഥാനങ്ങളായ കര്‍ണ്ണാടക, തമിഴ്‌നാട് കേന്ദ്രീകരിച്ചുമാണ് അന്വേഷണം പുരോഗമിക്കുന്നത്.

എയര്‍ പോര്‍ട്ടുകളില്‍ ലുക്ക് ഔട്ട് സര്‍ക്കുലര്‍ ഇറക്കിയതായും പൊലിസ് അറിയിച്ചു. കര്‍ണാടക, തമിഴ്‌നാട് സംസ്ഥാനങ്ങളിലേക്ക് ക്രൈം മെമോ അയച്ചതായും കേസ് അന്വേഷണം നടത്തുന്ന എസ്.എം.എസ് ഡി.വൈ.എസ്.പി പറഞ്ഞു.

ഇതിനിടെ ഇയാള്‍ ഹൈക്കോടതിയില്‍ മുന്‍കൂര്‍ ജാമ്യത്തിനായി ശ്രമിക്കുന്നതായും അതേ സമയം അടുത്ത ദിവസം കീഴടങ്ങുമെന്നും സൂചനയുണ്ട്.