കൊച്ചി: ഇടപ്പള്ളിക്കും ആലുവയ്ക്കുമിടയില്‍ ട്രാക്ക് അറ്റകുറ്റപണികള്‍ നടക്കുന്നതിനാല്‍ നാളെ മുതല്‍ 19 വരെ ഈ പാതയില്‍ ട്രെയിന്‍ സര്‍വിസുകള്‍ക്ക് നിയന്ത്രണമേര്‍പ്പെടുത്തി. കായംകുളം-എറണാകുളം സെക്ഷനിലെ ഹരിപ്പാട്-അമ്പലപ്പുഴ റൂട്ടില്‍ പാത ഇരട്ടിപ്പിക്കല്‍ ജോലികള്‍ നടക്കുന്നതിനാല്‍ നിലവില്‍ ട്രെയിനുകള്‍ക്ക് നിയന്ത്രണമുണ്ട്.
15 വരെയാണ് നിയന്ത്രണം. ഇതിന് പിന്നാലെയാണ് എറണാകുളം-തൃശൂര്‍ സെക്ഷനില്‍ ആലുവക്കും ഇടപ്പള്ളിക്കുമിടയില്‍ ഗതാഗത നിയന്ത്രണമേര്‍പ്പെടുത്തിയിരിക്കുന്നത്. നിരവധി ട്രെയിനുകള്‍ വൈകും.
സര്‍വിസുകളൊന്നും റദ്ദാക്കിയിട്ടില്ല. 14ന് തിരുവനന്തപുരം-ഹസ്രത്ത് നിസാമുദ്ദീന്‍ സൂപ്പര്‍ഫാസ്റ്റ് എക്‌സ്പ്രസ് (22653), 17ന് എറണാകുളം-പൂനെ സൂപ്പര്‍ഫാസ്റ്റ് എക്‌സ്പ്രസ് (22149), 18ന് തിരുവനന്തപുരം-ഹസ്രത്ത് നിസാമുദ്ദീന്‍ സൂപ്പര്‍ഫാസ്റ്റ് എക്‌സ്പ്രസ് (22655), 16, 19 തിയതികളില്‍ കൊച്ചുവേളി-ലോക്മാന്യതിലക് സൂപ്പര്‍ഫാസ്റ്റ് എക്‌സ്പ്രസ് (22114) എന്നീ ട്രെയിനുകള്‍ നിശ്ചിത സമയത്തിനും അരമണിക്കൂര്‍ വൈകിയാവും യാത്ര ആരംഭിക്കുക.
ഈ ട്രെയിനുകള്‍ 15 മിനുറ്റോളം എറണാകുളം ടൗണ്‍ (നോര്‍ത്ത്) സ്‌റ്റേഷനില്‍ പിടിച്ചിടും.
14 മുതല്‍ 19 വരെ ചെന്നൈ എഗ്മോര്‍-ഗുരുവായൂര്‍ എക്‌സ്പ്രസ് (16127) ഇടപ്പള്ളി സ്റ്റേഷനില്‍ ഒരു മണിക്കൂര്‍ 20 മിനുറ്റ് പിടിച്ചിടും. ചെന്നൈ-തിരുവനന്തപുരം സൂപ്പര്‍ഫാസ്റ്റ് എക്‌സ്പ്രസ് (12695, മംഗളൂരു-തിരുവനന്തപുരം മലബാര്‍ എക്‌സ്പ്രസ് (16630), മൈസൂര്‍-കൊച്ചുവേളി എക്‌സ്പ്രസ് (16315), മുംബൈ-കന്യാകുമാരി എക്‌സ്പ്രസ് (16381), ഗുരുവായൂര്‍-തിരുവനന്തപുരം ഇന്റര്‍സിറ്റി (16841) ട്രെയിന്‍ സര്‍വിസുകള്‍ 14 മുതല്‍ 17 വരെയുള്ള ദിവസങ്ങളില്‍ 25 മിനുറ്റോളം വൈകും. 14ന് ചെന്നൈ-തിരുവനന്തപുരം എ.സി എക്‌സ്പ്രസ് (22207), 15ന് അജ്മീര്‍-എറണാകുളം മരുസാഗര്‍ എക്‌സ്പ്രസ് (12978), ഹസ്രത്ത്-നിസാമുദ്ദീന്‍ തിരുവനന്തപുരം സ്വര്‍ണജയന്ത്രി എക്‌സ്പ്രസ് (12644), 16ന് പൂനെ-എറണാകുളം പൂര്‍ണ എക്‌സ്പ്രസ് (11097), ഹൗറ-എറണാകുളം അന്ത്യോദയ എക്‌സ്പ്രസ് (22877), 17ന് ബാനസവാടി-എറണാകുളം എക്‌സ്പ്രസ് (22608), 14, 16 ദിവസങ്ങളില്‍ ബാനസവാടി-കൊച്ചുവേളി ഹംസഫര്‍ എക്‌സ്പ്രസ് (16320) എന്നീ ട്രെയിനുകളും 25 മിനുറ്റ് വൈകിയോടും.