തിരുവനന്തപുരം: ബജറ്റിന്മേല്‍ ചര്‍ച്ച നടത്താതെ പാസാക്കി പിരിയാനുള്ള സര്‍ക്കാര്‍ തീരുമാനം നിയമസഭയുടെ അവകാശത്തിനുനേരെയുള്ള വെല്ലുവിളിയെന്ന് പ്രതിപക്ഷ നേതാവ് രമേശ് ചെന്നിത്തല. പ്രതിപക്ഷത്തിന്റെകൂടി ആവശ്യപ്രകാരമാണ് പ്രത്യേക സാഹചര്യത്തില്‍ ഈ തീരുമാനമെടുത്തതെന്ന് മറുപടിയായി മുഖ്യമന്ത്രി പിണറായി വിജയന്‍ പറഞ്ഞു.
കൊവിഡ് 19 വ്യാപിക്കുന്നതിന്റെ പശ്ചാത്തലത്തില്‍ ഒരുമാസം സഭാ സമ്മേളനം നിര്‍ത്തിവയ്ക്കാം. ഒന്നും ചര്‍ച്ച ചെയ്യേണ്ടതില്ലെന്ന നിലപാട് ജനാധിപത്യവിരുദ്ധമാണ്. ഇതിനെ ശക്തമായി എതിര്‍ക്കുന്നു. ഇതൊരു അവസരമാക്കി ചര്‍ച്ച ഒഴിവാക്കരുതെന്നും പ്രതിപക്ഷ നേതാവ് പറഞ്ഞു.
ബജറ്റ് ചര്‍ച്ച ഒഴിവാക്കുന്നത് ആദ്യമല്ലെന്നും ഉമ്മന്‍ചാണ്ടി മുഖ്യമന്ത്രിയായിരുന്നപ്പോള്‍ ഇങ്ങനെ ചെയ്‌തെന്നും പാര്‍ലമെന്ററികാര്യ മന്ത്രി എ.കെ ബാലന്‍ പറഞ്ഞു. പ്രതിപക്ഷത്തുനിന്ന് വിവിധ നേതാക്കള്‍ സര്‍ക്കാര്‍ നടപടിക്കെതിരേ രംഗത്തുവന്നു. കൊവിഡിന്റെ പേരില്‍ മുഖ്യമന്ത്രി സഭയില്‍നിന്ന് ഒളിച്ചോടരുതെന്നും രാജ്യത്ത് വിവിധ നിയമസഭകള്‍ ഇപ്പോള്‍ സമ്മേളിക്കുന്നുണ്ടെന്നും കെ.സി ജോസഫ് പറഞ്ഞു. ജനാധിപത്യവിരുദ്ധ നടപടികള്‍ക്ക് സ്പീക്കര്‍ കൂട്ടുനില്‍ക്കരുതെന്ന് പി.ടി തോമസ് ആവശ്യപ്പെട്ടു.
കൊവിഡിന്റെ പശ്ചാത്തലത്തില്‍ നിയമസഭാ സമ്മേളനം ചേരുന്നത് ശരിയല്ലെന്ന് മൂന്നുദിവസം മുന്‍പ് സ്പീക്കറോട് ആവശ്യപ്പെട്ടത് പ്രതിപക്ഷമാണെന്ന് മുഖ്യമന്ത്രി പറഞ്ഞു. പ്രതിപക്ഷ അംഗം കെ.എന്‍.എ ഖാദര്‍ രേഖാമൂലം കത്തുനല്‍കുകയും ചെയ്തു. പി.സി ജോര്‍ജും വളരെ ഗൗരവമായി ഇതേക്കുറിച്ച് പറഞ്ഞിരുന്നു. സഭ തുടരുന്നത് ശരിയല്ലെന്ന് ചൂണ്ടിക്കാട്ടി നാടിന്റെ വിവിധ ഭാഗങ്ങളില്‍ നിന്ന് അഭിപ്രായം വന്നു. ആരും ഇവിടെനിന്ന് ഒളിച്ചോടുന്നില്ലെന്നും മുഖ്യമന്ത്രി പറഞ്ഞു.