കൊച്ചി: കൊവിഡ്- 19 പടരാതിരിക്കുന്നതിനു വേണ്ടി മുന്‍കരുതലെന്ന നിലയില്‍ എല്ലാ വിനോദയാത്രകളും പഠനയാത്രകളും മറ്റു യാത്രകളും പൂര്‍ണമായി നിര്‍ത്തിവയ്ക്കുകയും വിവാഹ ഓട്ടങ്ങള്‍ ചുരുക്കുകയും ചെയ്തതോടെ ടൂറിസ്റ്റ് ബസ് വ്യവസായം പൂര്‍ണമായി നിലച്ചതായി ബസ് ഉടമകള്‍.
ആയിരക്കണക്കിന് ഉടമകളും പതിനായിരക്കണക്കിന് ജീവനക്കാരും കുടുബാംഗങ്ങളും വലിയ പ്രതിസന്ധി നേരിടുകയാണ്. ഭാരിച്ച തുക മുന്‍കൂര്‍ നികുതിയായി അടച്ചതെല്ലാം പാഴായി.
ബാങ്കില്‍ നിന്ന് ഭീമമായ തുകകള്‍ വായ്പയെടുത്ത ഉടമകള്‍ തിരിച്ചടവിനായി മര്‍ഗമില്ലാതെ നെട്ടോട്ടമോടുകയാണ്. സാമ്പത്തിക വര്‍ഷത്തിന്റെ അവസാനമായതിനാല്‍ ബാങ്കുകളില്‍ നിന്ന് വായ്പാ തിരിച്ചടവിനായി കടുത്ത സമ്മര്‍ദമാണ്. ഈ പ്രതിസന്ധിയില്‍ നിന്ന് തങ്ങളെ രക്ഷിക്കുന്നതിന് അടിയന്തിരമായി സര്‍ക്കാര്‍ ബാങ്കുകളുമായി സംസാരിച്ച് വായ്പകള്‍ക്ക് മൊറട്ടോറിയം ഏര്‍പ്പെടുത്താനും അടുത്ത ത്രൈമാസ വാഹന നികുതി ഒഴിവാക്കാനും അടിയന്തിര ഇടപെടല്‍ നടത്തണമെന്ന് ഉടമകള്‍ ആവശ്യപ്പെട്ടു.
ഇതേ ആവശ്യമുന്നയിച്ച് കോണ്‍ട്രാക്ട് കാരേജ് ഓപ്പറേറ്റേഴ്‌സ് അസോസിയേഷന്‍ മുഖ്യമന്ത്രിക്കും ഗതാഗത മന്ത്രിക്കും അപേക്ഷ നല്‍കിയെന്ന് സംസ്ഥാന പ്രസിഡന്റ് ബിനു ജോണും ജനറല്‍ സെക്രട്ടറി എസ്. പ്രശാന്തനും വാര്‍ത്താക്കുറിപ്പില്‍ അറിയിച്ചു.