അബൂദബി: ഏഷ്യന്‍ കപ്പ് ഫുട്‌ബോളിലെ കലാശപ്പോരില്‍ അബൂദബി സായിദ് സ്‌പോട്‌സ് സിറ്റി സ്റ്റേഡിയത്തെ സാക്ഷിനിര്‍ത്തി കന്നി കിരീടം ഖത്തര്‍ നേടിയെടുത്തു. എ.എഫ്.സി കപ്പില്‍ ഒന്നിനെതിരെ മൂന്ന് എന്ന കണക്കില്‍ പകരം വീട്ടിയാണ് ഖത്തര്‍ കപ്പെടുത്തത്.  ശക്തരായ ജപ്പാനെതിരെ മികച്ച മുന്നേറ്റങ്ങളും തകര്‍പ്പന്‍ പ്രധിരോധവും കളിയില്‍ ഉടനീളം നിലനിര്‍ത്തിയാണ് ഖത്തര്‍ വിജയം കൈവരിച്ചത്.

അല്‍മോയിസ് അലി(12), അബ്ദുള്ളസീസ് ഹാതെം(27), അക്രം അഫിഫ് (83) എന്നിവരാണ് ഖത്തറിന് വേണ്ടി വലകുലുക്കിയത്. ആദ്യ പകുതിയില്‍ തന്നെ ആദിപത്യം ഉറപ്പിക്കാന്‍ തുനിഞ്ഞിറങ്ങിയ ഖത്തര്‍ രണ്ട് ഗോള്‍ നേടി. 

രണ്ടïാം പകുതിയില്‍ ജപ്പാന്‍ ഒന്നിനു പിറകെ ഒന്നായി ആക്രമണങ്ങള്‍ നടത്തിയതിനെ തുടര്‍ന്നാണ് ഒരു ഗോള്‍ തിരിച്ചടിക്കാനായത്. മനോഹരമായ നീക്കത്തിനൊടുവില്‍ യുയ ഒസാക്കോ ബോക്‌സിനുള്ളിലേക്കു നല്‍കിയ ത്രൂബോള്‍ മുന്നോട്ട് കയറി വന്ന ഖത്തര്‍ ഗോളിക്കു മുകളിലൂടെ മിനാമിനൊ വലയിലേക്കു ചിപ്പ് ചെയ്തിടുകയായിരുന്നു.സമനില ഗോളിനായി ജപ്പാന്‍ കിണഞ്ഞു പരിശ്രമിക്കവെയാണ് 83-ാം മിനുട്ടില്‍ റഫറി ഖത്തറിന് അനുകൂലമായി പെനാല്‍റ്റി വിധിച്ചത്

കോര്‍ണറിനൊടുവില്‍ ജാപ്പനീസ് ക്യാപ്റ്റന്‍ മായ യോഷിദ പന്ത് കൈ കൊïണ്ട് തട്ടിയതിനെ തുടര്‍ന്നായിരുന്നു റഫറി പെനാല്‍റ്റി വിധിച്ചത്. പെനാല്‍റ്റി അക്രം അഫീഫ് ലക്ഷ്യത്തിലെത്തിച്ചതോടെ ഖത്തര്‍ 3-1 വിജയം ഉറപ്പിച്ചു. ടൂര്‍ണമെന്റിലുടനീളം മികച്ച പ്രകടനം നടത്തിയ ഖത്തര്‍ കിരീടം അര്‍ഹിച്ചതായിരുന്നു. ടൂര്‍ണമെന്റില്‍ ഒരു ഗോള്‍ മാത്രമാണ് ഖത്തര്‍ വഴങ്ങിയിട്ടുള്ളത്.

കന്നികിരീടം മോഹിച്ച് കളത്തിലിറങ്ങിയ ഖത്തറിന് ഗാലറിയില്‍ നിന്നും മല്‍സരശേഷം ചെരിപ്പേറുവരെ നേരിട്ടുണ്ടെങ്കിലും ഖത്തറിനെ ഇതൊന്നും അലട്ടുന്നില്ലെന്നും സ്‌ട്രൈക്കര്‍ അല്‍ മോയിസ് അലി പറഞ്ഞിരുന്നു. അല്‍ മോയിസ് ആണ് ഏറ്റവും ഗോളടിച്ച താരം. ടൂര്‍ണ്ണമെന്റില്‍ ഒമ്പത് ഗോളാണ് അടിച്ച് കൂട്ടിയത്.