ഭൂവനേശ്വര്‍: ഐ ലീഗില്‍ നെരോക്കക്കും ഐസ്വാളിനും ജയം. നൊരോക്ക 3-2ന് ഇന്ത്യന്‍ ആരോസിനെ പരാജയപ്പെടുത്തിയപ്പോള്‍ ഐസ്വാള്‍ നിലവിലെ ചാംപ്യന്മാരായ മിനര്‍വ പഞ്ചാബിനെ എതിരില്ലാത്ത ഒരു ഗോളിന് തകര്‍ത്തു.
ജപ്പാന്‍ താരം കാറ്റ്‌സുമി യുസയുടെ ഇരട്ടഗോള്‍ ബലത്തിലാണ് നെരോക്ക ഇന്ത്യന്‍ ആരോസിനെ തറപറ്റിച്ചത്. കലിങ്ക സ്റ്റേഡിയത്തില്‍ നടന്ന മത്സരത്തില്‍ ആദ്യം മുന്‍പിലെത്തിയത് ആരോസ് ആണ്. 34ാം മിനുട്ടില്‍ ബോറിസ് സിങ് തങ്ജമാണ് ആരോസിന് ലീഡ് നേടിക്കൊടുത്തത്. 38ാം മിനുട്ടില്‍ ചിഡിയുടെ ഗോളില്‍ നെരോക്ക ആരോസിനെ ഒപ്പംപിടിച്ചു. 62ാം മിനുട്ടില്‍ രോഹിത് ദാനുവിന്റെ ഗോളില്‍ ആരോസ് വീണ്ടും ലീഡെടുത്തു. 68ാം മിനുട്ടിലെ ഗോളോടെ നെരോക്കക്ക് സമനില നേടിക്കൊടുത്ത കാറ്റ്‌സുമി യുസ 87ാം മിനുട്ടില്‍ ലഭിച്ച പെനാല്‍റ്റി ലക്ഷ്യത്തിലെത്തിച്ച് നെരോക്കയെ വിജയത്തിലെത്തിക്കുകയായിരുന്നു. ലീഗില്‍ വിജയമില്ലാതെ തുടര്‍ച്ചയായ എട്ടാം മത്സരമാണ് മിനര്‍വ പൂര്‍ത്തീകരിച്ചത്. 69ാം മിനുട്ടില്‍ ലാല്‍റിഞ്ചാനയാണ് ഐസ്വാളിന്റെ വിജയഗോള്‍ നേടിയത്. ജയത്തോടെ മിനര്‍വയെ പിന്തള്ളി ഐസ്വാള്‍ പട്ടികയില്‍ ഏഴാം സ്ഥാനത്തേക്ക് കയറി.