കൊച്ചി: പ്രഥമ പ്രോ വോളിബോള്‍ ലീഗ് ഇന്ന് മുതല്‍ കൊച്ചി കടവന്ത്ര രാജീവ്ഗാന്ധി ഇന്‍ഡോര്‍ സ്റ്റേഡിയത്തില്‍ തുടങ്ങും. കേരളത്തില്‍ നിന്നടക്കം ആറു നഗരങ്ങളെ പ്രതിനിധീകരിച്ച് ടീമുകള്‍ പങ്കെടുക്കും. രണ്ടു വേദികളിലായി 18 മത്സരങ്ങള്‍. ആദ്യ 12 മത്സരങ്ങള്‍ കൊച്ചിയിലും രണ്ടു സെമി ഫൈനലുകളും ഫൈനലും അടക്കം ആറു മത്സരങ്ങള്‍ ചെന്നൈയിലുമാണ് നടക്കുക. ഇന്ന് വൈകിട്ട് ഏഴിന് ഉദ്ഘാടന മത്സരത്തില്‍ കൊച്ചി ബ്ലൂ സ്‌പൈക്കേഴ്‌സ് യു മുംബ വോളിയെ നേരിടും. ബാഡ്മിന്റണ്‍ താരം പി.വി സിന്ധു അടക്കമുള്ള പ്രമുഖര്‍ ഉദ്ഘാടന മത്സരം വീക്ഷിക്കാനെത്തും. ഇന്ത്യന്‍ ക്യാപ്റ്റന്‍ മോഹന്‍ ഉക്രപാണ്ഡ്യനാണ് ബ്ലൂ സ്‌പൈക്കേഴ്‌സിന്റെ നായകന്‍. ഛത്തിസ്ഗഡില്‍ നിന്നുള്ള ദീപേഷ് സിന്‍ഹയാണ് യു മുംബ ക്യാപ്റ്റന്‍. കാലിക്കറ്റ് ഹീറോസ്, ചെന്നൈ സ്പാര്‍ട്ടന്‍സ്, അഹമ്മദാബാദ് ഡിഫന്റേഴ്‌സ്, ബ്ലാക്ക് ഹോക്‌സ് ഹൈദരാബാദ് എന്നിവയാണ് ടൂര്‍ണമെന്റിലെ മറ്റു ടീമുകള്‍. പ്രാഥമിക ഘട്ടത്തില്‍ ഓരോ ടീമുകളും റൗണ്ട് റോബിന്‍ അടിസ്ഥാനത്തില്‍ മത്സരിക്കും. മികച്ച നാലു ടീമുകള്‍ സെമി ഫൈനലിന് യോഗ്യത നേടും. ദിവസവും ഏഴിനാണ് മത്സരങ്ങള്‍. 22ന് ചെന്നൈയിലാണ് ഫൈനല്‍. സോണി സിക്‌സിലും സോണി ടെന്‍ ത്രീയിലും സോണി ലൈവ് ആപ്പിലും മത്സരങ്ങള്‍ തത്സമയം കാണാം. ആറു ടീമുകളിലും രണ്ട് വിദേശ താരങ്ങള്‍ ഉള്‍പ്പെടെ 12 കളിക്കാരാണുള്ളത്. അമേരിക്കയുടെ ഒളിംപിക് താരങ്ങളായ ഡേവിഡ് ലീ കൊച്ചിക്കും പോള്‍ ലോട്ട്മാന്‍ കാലിക്കറ്റിനും വേണ്ടി കളിക്കും. ഇന്ത്യയുടെ രാജ്യാന്തര താരങ്ങളായ പ്രഭാകരന്‍, ജെറോം വിനീത്, അഖിന്‍ ജാസ്, ദീപേഷ് സിന്‍ഹ, രഞ്ജിത് സിങ്, ഗുരുന്ദീര്‍ സിങ്, വിനീത് ചൗധരി, ഉക്രപാണ്ഡ്യന്‍ എന്നിവരാണ് ലീഗിലെ ഐക്കണ്‍ താരങ്ങള്‍.

ആരാധകര്‍ക്ക് ആവേശം പകരാനും കളിക്ക് വേഗം കൂട്ടാനുമായി റൗണ്ട് റോബിന്‍ മത്സരങ്ങള്‍ 15 പോയിന്റ് വീതമുള്ള അഞ്ചു സെറ്റായിട്ടായിരിക്കും. ആദ്യം 15 പോയിന്റിലെത്തുന്നവര്‍ വിജയിക്കും. പ്ലേ ഓഫുകളില്‍ ഓരോ സെറ്റും 25 പോയിന്റ് വീതമായിരിക്കും. വിജയിക്കുന്ന ടീമിന് രണ്ട് പോയിന്റ് വീതം നല്‍കും. ഒരു ടീം 50ന് വിജയിച്ചാല്‍ അത് വൈറ്റ് വാഷ് ആകും. ആ ടീമിന് മൂന്നു പോയിന്റ് ലഭിക്കും. ആവേശം കൂട്ടുന്നതിനായി സൂപ്പര്‍ സെര്‍വ്, സൂപ്പര്‍ പോയിന്റ് എന്നിങ്ങനെ രണ്ടു ആശയങ്ങള്‍ കൂടി ഉള്‍പ്പെടുത്തിയിട്ടുണ്ട്.
ഓരോ ഏസ് സെര്‍വ് ചെയ്യുന്നതിനും രണ്ടു പോയിന്റ് വീതം ടീമിന് ലഭിക്കും. ഇതിന് സൂപ്പര്‍ സെര്‍വ് എന്നു പറയും. ഓരോ സെറ്റിലും ടീമിന് സൂപ്പര്‍ പോയിന്റ് വിളിക്കാം. സൂപ്പര്‍ പോയിന്റ് വിളിച്ച ടീം അതു നേടിയാല്‍ രണ്ടു പോയിന്റ് ലഭിക്കും.
തോറ്റാല്‍ എതിരാളികള്‍ക്ക് രണ്ടു പോയിന്റ് ലഭിക്കും. ഒരു ടീം 11 പോയിന്റ് നേടുന്നതു വരെ മാത്രമാണ് സൂപ്പര്‍ പോയിന്റ് വിളിക്കാന്‍ അനുവാദമുള്ളത്. മത്സരങ്ങള്‍ക്കായി എല്ലാ ടീമുകളും കൊച്ചിയിലെത്തിയിട്ടുണ്ട്.