കൊച്ചി: സി.എം.പിയിലെ ഒരുവിഭാഗം സി.പി.എമ്മില്‍ ലയിക്കുന്നത് കോടതി തടഞ്ഞു. എം.വി രാഘവന്റെ മകന്‍ എം.വി രാജേഷ് നല്‍കിയ ഹരജിയെ തുടര്‍ന്ന് എറണാകുളം മുന്‍സിഫ് കോടതിയാണ് ലയനം തടഞ്ഞുകൊണ്ട് ഇടക്കാല ഉത്തരവ് പുറപ്പെടുവിച്ചത്.
എം.വി രാജേഷിനെ പാര്‍ട്ടിയില്‍ നിന്ന് പുറത്താക്കിയ നടപടിയും കോടതി സ്റ്റേ ചെയ്തു. പാര്‍ട്ടി ഭരണഘടന അനുസരിച്ച് പാര്‍ട്ടി കോണ്‍ഗ്രസിന് മാത്രമേ നയപരമായ കാര്യങ്ങളില്‍ തീരുമാനമെടുക്കാനാവുകയുള്ളൂവെന്ന് എം.വി രാജേഷിന് വേണ്ടി ഹാജരായ അഭിഭാഷകന്‍ വാദിച്ചു. ഇത്തരത്തിലുള്ള തീരുമാനം പാര്‍ട്ടി കോണ്‍ഗ്രസില്‍ എടുത്തിട്ടില്ലെന്നും എം.വി രാജേഷിനെ പുറത്താക്കിയത് ഏകപക്ഷീയമായിട്ടാണെന്നും അഭിഭാഷകന്‍ വാദിച്ചു. സി.എം.പി ജനറല്‍ സെക്രട്ടറിയായിരുന്ന എം.കെ കണ്ണന്റെ നേതൃത്വത്തിലുള്ള വിഭാഗമാണ് സി.പി.എമ്മില്‍ ലയിക്കാന്‍ തയാറെടുത്തിരിക്കുന്നത്. ഈ മാസം മൂന്നിനാണ് ലയന സമ്മേളനം തീരുമാനിച്ചിരുന്നത്. മുഖ്യമന്ത്രി പിണറായി വിജയന്‍ അടക്കമുള്ള നേതാക്കള്‍ ലയന സമ്മേളനത്തില്‍ പങ്കെടുക്കുമെന്ന് എം.കെ കണ്ണന്‍ നേരത്തേ വാര്‍ത്താസമ്മേളനത്തില്‍ വ്യക്തമാക്കിയിരുന്നു.