ബംഗളുരു: ജീവനക്കാരന് കൊവിഡ് 19 സംശയത്തെത്തുടര്‍ന്ന് ബംഗളുരുവിലെ ഇന്‍ഫോസിസിന്റെ ഒരു ഓഫിസ് അടച്ചു. മുന്‍കരുതലിന്റെ ഭാഗമായാണ് ഈ കെട്ടിടത്തിന്റെ പ്രവര്‍ത്തനം നിര്‍ത്തിയതെന്നും ജീവനക്കാരോട് വീടുകളില്‍ ഇരുന്ന് ജോലി ചെയ്യാന്‍ നിര്‍ദ്ദേശിച്ചതായും കമ്പനി അറിയിച്ചു.

ബംഗളുരു നഗരത്തില്‍ ഒരു ക്യാംപസായി പ്രവര്‍ത്തിക്കുന്ന ഇന്‍ഫോസിസിന്റെ ഐ.ഐ.പി.എം കെട്ടിടമാണ് ഒഴിപ്പിച്ചത്. ജീവനക്കാരുടെ സുരക്ഷ ഉറപ്പാക്കുന്നതിന്റെ ഭാഗമായാണ് ഈ നടപടി. സുരക്ഷ ഉറപ്പാക്കാന്‍ മേഖല അണുവിമുക്തമാക്കുന്നതിന് വേണ്ടിയുള്ള നടപടികള്‍ സ്വീകരിക്കുമെന്നും ഇന്‍ഫോസിസ് ബംഗളുരു ഡവലപ്‌മെന്റ് സെന്റര്‍ ഹെഡ് ഗുരുരാജ് ദേശ്പാണ്ഡ്യ വ്യക്തമാക്കി.

ആശങ്കപ്പെടേണ്ട സാഹചര്യമില്ല. സമൂഹമാധ്യമങ്ങള്‍ വഴിയോ മാധ്യമങ്ങള്‍ വഴിയോ തെറ്റായ വാര്‍ത്തകള്‍ പ്രചരിപ്പിക്കരുതെന്നും കമ്പനി ജീവനക്കാര്‍ക്ക് അയച്ച മെയിലില്‍ പറയുന്നു.