മുക്കം: സമസ്ത കേരള ജംഇയ്യത്തുല്‍ മുഅല്ലിമീന്‍ ജില്ലാ കമ്മിറ്റി സംഘടിപ്പിക്കുന്ന 15-ാമത് ഇസ്‌ലാമിക കലാമേളയ്ക്ക് കാരമൂല ദാറുസ്വലാഹ് ഇസ്‌ലാമിക് അക്കാദമി ഒരുങ്ങി. ആറു മേഖലാ മത്സരങ്ങളിലെ 550ഓളം ജേതാക്കളാണ് 60 ഇനങ്ങളിലും ആറു വേദികളിലുമായി നടക്കുന്ന ജില്ലാ കലാമേളയില്‍ മാറ്റുരയ്ക്കുക. റെയ്ഞ്ചുതലം മുതല്‍ നടപ്പാക്കിയ ഓണ്‍ലൈന്‍ സംവിധാനവും മത്സര ലൈവും ഇപ്രാവശ്യത്തെ കലാമേളയുടെ പ്രത്യേകതയാണ്. ഇന്ന് ഉച്ചയ്ക്ക് രണ്ടിനു സമസ്ത മുശാവറ അംഗം കെ. ഉമര്‍ ഫൈസി മുക്കം പതാക ഉയര്‍ത്തുന്നതോടെ കലാമേളക്ക് തുടക്കമാകും. 2.30ന് നടക്കുന്ന ജില്ലാ ലീഡേഴ്‌സ് മീറ്റ് കോഴിക്കോട് ഖാസി സയ്യിദ് മുഹമ്മദ്‌കോയ തങ്ങള്‍ ജമലുല്ലൈലി ഉദ്ഘാടനം ചെയ്യും. സ്വാഗതസംഘം രക്ഷാധികാരി വി. മോയിമോന്‍ ഹാജി അധ്യക്ഷനാകും. സമസ്ത കേരള ജംഇയ്യത്തുല്‍ മുഅല്ലിമീന്‍ സംസ്ഥാന ജനറല്‍ സെക്രട്ടറി ഡോ. ബഹാഉദ്ദീന്‍ മുഹമ്മദ് നദ്‌വി മുഖ്യപ്രഭാഷണം നടത്തും. നാളെ രാവിലെ 8.30ന് മത്സരങ്ങള്‍ ആരംഭിക്കും.