മണ്ണാര്‍ക്കാട്: എസ്.കെ.എസ്.എസ്.എഫ് സംസ്ഥാന കമ്മിറ്റിയുടെ സംരംഭമായ ഇസ്‌ലാമിക് സെന്ററിന്റെ ആഭിമുഖ്യത്തില്‍ മണ്ണാര്‍ക്കാട് ബസ് സ്റ്റാന്‍ഡിന് അടുത്തുള്ള കുടുഗ്രൗണ്ടില്‍ നടത്തിയ സിംസാറുല്‍ ഹഖ് ഹുദവിയുടെ റമദാന്‍ പ്രഭാഷണം സമാപിച്ചു.
സമാപന ദിക്‌റ് ദുആ മജ്‌ലിസിന് പ്രമുഖ പണ്ഡിതനും സൂഫിവര്യനുമായ ഏലംകുളം ബാപ്പു മുസ്‌ലിയാര്‍ നേതൃത്വം നല്‍കി. ചെമ്മാട് ദാറുല്‍ഹുദാ ഇസ്‌ലാമിക് യൂനിവേഴ്‌സിറ്റിയില്‍ നിന്നു ബിരുദവും ബിരുദാനന്തര ബിരുദവും നേടിയ സിംസാറുല്‍ ഹഖ് ഹുദവി അറബി, ഇംഗ്ലീഷ്, ഉറുദു എന്നീ ഭാഷകളിലായി വിവിധ രാഷ്ട്രങ്ങളില്‍ പ്രഭാഷണങ്ങള്‍ നടത്തിയിട്ടുണ്ട്.
പ്രഭാഷണം ശ്രവിക്കാന്‍ സ്ത്രീകളടക്കം പതിനായിരത്തിലധികം ശ്രോതാക്കളാണ് മണ്ണാര്‍ക്കാട്ടെ പ്രഭാഷണ നഗരിയിലേക്ക് ഒഴുകിയെത്തിയത്.
എസ്.കെ.എസ്.എസ്.എഫ് സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങള്‍ ചടങ്ങ് ഉദ്ഘാടനം ചെയ്തു. എസ്.കെ.ജെ.എം സംസ്ഥാന പ്രസിഡന്റ് സി.കെ.എം സ്വാദിഖ് മുസ്‌ലിയാര്‍ അധ്യക്ഷനായി.
അന്‍വര്‍ ഫൈസി കാഞ്ഞിരപ്പുഴ ആമുഖ പ്രഭാഷണം നടത്തി. അഡ്വ.എന്‍. ഷംസുദ്ദീന്‍ എം.എല്‍.എ മുഖ്യാഥിതിയായി. പി.കെ ഇമ്പിച്ചിക്കോയ തങ്ങള്‍ കൊടക്കാട്, സി.പി ബാപ്പു മുസ്‌ലിയാര്‍, സി. മുഹമ്മദലി ഫൈസി, ടി.കെ മുഹമ്മദ്കുട്ടി ഫൈസി പട്ടാമ്പി, ഫായിദ ബഷീര്‍, മുസ്തഫ അഷ്‌റഫി കക്കുപ്പടി, അഡ്വ.ടി.എ സിദ്ധീഖ്, ഷമീര്‍ ഫൈസി കോട്ടോപ്പാടം, റഹീം ഫൈസി അക്കിപ്പാടം, ടി.കെ സുബൈര്‍ മൗലവി, നിസാമുദ്ദീന്‍ ഫൈസി, ടി.ടി ഉസ്മാന്‍ ഫൈസി, ഹാരിസ് മാസ്റ്റര്‍ പുല്ലിശ്ശേരി, കെ.പി ബാപ്പുട്ടിഹാജി, ഹമീദ് ഹാജി പൊന്നങ്കോട്, വി.കെ അബൂബക്കര്‍ എന്നിവര്‍ സംബന്ധിച്ചു. ഹബീബ് ഫൈസി കോട്ടോപ്പാടം സ്വാഗതവും സംസം ബഷീര്‍ ഹാജി നന്ദിയും പറഞ്ഞു.