കൊടുങ്ങല്ലൂര്‍: കൊടുങ്ങല്ലൂര്‍ ചാപ്പാറയിലെ നഗരസഭ മാലിന്യ സംസ്‌ക്കരണ പ്ലാന്റുമായി ബന്ധപ്പെട്ട് ജനകീയ അഭിപ്രായ രൂപീകരണത്തിന് മൂന്നംഗ സമിതിയെ നഗരസഭ യോഗം നിയോഗിച്ചു. സമീപവാസികളുമായി ചര്‍ച്ച നടത്തി മാലിന്യ സംസ്‌ക്കരണ പ്ലാന്റ് ദോഷകരമല്ലാത്ത രീതിയില്‍ പ്രവര്‍ത്തിക്കുന്നതിന് അഭിപ്രായ ഐക്യമുണ്ടാക്കുകയാണ് സമിതിയുടെ ദൗത്യം.
സി.പി.ഐ അംഗം അശോകന്‍, കോണ്‍ഗ്രസ് അംഗം എ.സി കവിത, ബി.ജെ.പി അംഗം ഒ.എന്‍ ജയദേവന്‍ എന്നിവരെയാണ് നഗരസഭ കൗണ്‍സില്‍ നിയോഗിച്ചിട്ടുള്ളത്. നഗരത്തിലെ മാലിന്യ നിര്‍മാര്‍ജനം കാര്യക്ഷമമാക്കണമെന്ന് കോണ്‍ഗ്രസ് ഐ നഗരസഭ കക്ഷി നേതാവ് വി.എം ജോണി ആവശ്യപ്പെട്ടു. ചാപ്പാറയിലെ പ്ലാന്റ് തുറന്ന് പ്രവര്‍ത്തിപ്പിക്കണമെന്നും വി.എം ജോണി പറഞ്ഞു. ഒന്നാം ഘട്ട നിര്‍മാണം പൂര്‍ത്തിയായ നഗരസഭ ബസ് സ്റ്റാന്‍ഡ് ഇന്ന് തുറന്ന് കൊടുക്കാന്‍ യോഗം തീരുമാനിച്ചു. അടുത്ത രണ്ട് ഘട്ട നിര്‍മാണ പ്രവര്‍ത്തനങ്ങള്‍ കാലതാമസം കൂടാതെ നടത്തുവാനും യോഗത്തില്‍ തീരുമാനമായി.
കുഷ്ഠ രോഗ ലക്ഷണങ്ങള്‍ കണ്ടെത്തിയ സാഹചര്യത്തില്‍ നഗരസഭ പ്രദേശത്ത് വിപുലമായ പ്രതിരോധ ബോധവല്‍ക്കരണ പ്രവര്‍ത്തനങ്ങള്‍ നടത്തുവാനും യോഗം തീരുമാനിച്ചു. നഗരസഭ ചെയര്‍മാന്‍ സി.സി വിപിന്‍ചന്ദ്രന്‍ അധ്യക്ഷനായി. വൈസ് ചെയര്‍പേഴ്‌സണ്‍ ഷീല രാജ്കമല്‍, പ്രതിപക്ഷ നേതാവ് വി.ജി ഉണ്ണികൃഷ്ണന്‍, സ്റ്റാന്റിങ് കമ്മിറ്റി ചെയര്‍മാന്‍ കെ.എസ് കൈസാബ്, സി.കെ രാമനാഥന്‍, പി.എന്‍ രാമദാസ്, അഡ്വ. സി.പി രമേശന്‍ സംസാരിച്ചു.