കൊച്ചി: കൊവിഡ്-19 നിരീക്ഷണത്തില്‍ കഴിയുന്നയാള്‍ നെടുമ്പാശ്ശേരിയില്‍ നിന്ന് കൊച്ചി- ദുബൈ വിമാനത്തില്‍ കയറി. എമിറേറ്റ്‌സ് വിമാനത്തിലാണ് ഇയാള്‍ കയറിയത്. യു.കെ. സ്വദേശിയായ ഇയാള്‍ ദുബായ് വഴി നാട്ടിലേക്ക് തിരിച്ചു പോവാനുള്ള ശ്രമത്തിലായിരുന്നു. ഇയാള്‍ക്കൊപ്പമുള്ള 19 അംഗ സംഘവും വിമാനത്തില്‍ കയറിയിരുന്നു. വിമാനത്തിലെ മുഴുവന്‍ യാത്രക്കാരേയും തിരിച്ചിറക്കിയിട്ടുണ്ട്.

വിമാനത്തിലെ 270 യാത്രക്കാരെയും ആശുപത്രിയില്‍ പരിശോധനയ്ക്കു വിധേയമാക്കുമെന്ന് സിയാല്‍ അധികൃതര്‍ അറിയിച്ചു. വിമാനത്താവളം അടച്ചിടാന്‍ സാധ്യതയുണ്ട്.

രോഗലക്ഷണങ്ങളെ തുടര്‍ന്ന് ഇയാള്‍ നിരീക്ഷണത്തിലായിരുന്നു. എന്നാല്‍, ഇന്ന് രാവിലെ കൊച്ചിയില്‍നിന്നു ദുബായിലേക്കുള്ള വിമാനം കയറാനായി ഇയാള്‍ നെടുമ്പാശേരി വിമാനത്താവളത്തിലെത്തി. ഇയാള്‍ നിരീക്ഷണത്തിലുള്ളയാളാണെന്നു തിരിച്ചറിയാതെ അധികൃതര്‍ വിമാനത്തില്‍ കയറ്റിവിടുകയും ചെയ്തു.

അതിനിടെ, സ്രവപരിശോധന ഫലത്തില്‍ ഇയാളുടേത് പോസിറ്റീവാണെന്നു കണ്ടെത്തി. തുടര്‍ന്നുള്ള അന്വേഷണത്തിലാണ് ഇയാള്‍ വിമാനത്തില്‍ കയറിയെന്നു കണ്ടെത്തിയത്. തുടര്‍ന്ന് യാത്രക്കാരെ മുഴുവന്‍ തിരിച്ചിറക്കുകയായിരുന്നു.

കേരളത്തില്‍ പുതിയ കേസുകള്‍ ഇന്നലെ റിപ്പോര്‍ട്ട് ചെയ്തിട്ടില്ലെങ്കിലും പരിശോധനകള്‍ ശക്തമാക്കാനാണ് സര്‍ക്കാന്‍ തീരുമാനം. ഇതിന്റെ ഭാഗമായി റെയില്‍വെ സ്റ്റേഷനുകളിലും റോഡുകളിലും പരിശോധന ആരംഭിച്ചിട്ടുണ്ട്.