കൊടുങ്ങല്ലൂര്‍: കയ്യേറ്റ ഭീഷണിയെ തുടര്‍ന്ന് കൊടുങ്ങല്ലൂരിലെ അഴീക്കോട് മേഖലയില്‍ നിന്നും അന്യ സംസ്ഥാന തൊഴിലാളികള്‍ കൂടൊഴിയുന്നു. അഴീക്കോട് ജെട്ടി കേന്ദ്രീകരിച്ച് മത്സ്യ ബന്ധനത്തിലും നിര്‍മാണ തൊഴിലില്‍ ഏര്‍പ്പെട്ടു വരുന്ന അന്യ സംസ്ഥാന തൊഴിലാളികള്‍ക്കാണ് നില നില്‍പ്പിന് ഭീഷണി നേരിട്ടതിനെ തുടര്‍ന്ന് പോകുന്നത്.
സമീപ കാലത്ത് അഴീക്കോട് പ്രദേശത്ത് അന്യ സംസ്ഥാന തൊഴിലാളികള്‍ക്ക് നേരേ ഭീഷണിയും കയ്യേറ്റ ശ്രമങ്ങളും നടന്നു വരുന്നുണ്ട്. ഇക്കഴിഞ്ഞ ദിവസം മത്സ്യ ബന്ധനം കഴിഞ്ഞ് എത്തിയ ബംഗാളികളായ തൊഴിലാളികളെ ഒരു സംഘം കയ്യേറ്റം ചെയ്യാന്‍ ശ്രമിച്ചത് സംഘട്ടനത്തില്‍ കലാശിക്കുകയായിരുന്നു. ഈ സംഭവവുമായി ബന്ധപ്പെട്ട് നാട്ടുകാരായ നാല് പേര്‍ക്കും, പത്ത് ബംഗാള്‍ സ്വദേശികള്‍ക്കുമെതിരേ കൊടുങ്ങല്ലൂര്‍ പൊലിസ് കേസെടുക്കുകയുണ്ടായി. ഈ സാഹചര്യത്തിലാണ് അന്യ സംസ്ഥാന തൊഴിലാളികള്‍, പ്രത്യേകിച്ച് ബംഗാളികള്‍ പ്രദേശം വിട്ട് പോകാന്‍ നിര്‍ബന്ധിതരാകുന്നത്.
പെരുമ്പാവൂര്‍ കൊലപാതക കേസിലെ പ്രതി അന്യ സംസ്ഥാന തൊഴിലാളിയാണെന്ന കണ്ടെത്തലിനനെ തുടര്‍ന്ന് സംശയത്തിന്റെ നിഴലിലായ ഇവര്‍ തങ്ങള്‍ക്ക് നേരെ ഇനിയും കയ്യേറ്റ ശ്രമം ഉണ്ടാകുമെന്ന ഭീതിയിലാണ്. എന്നാല്‍, അന്യ സംസ്ഥാന തൊഴിലാളികള്‍ക്ക് നേരെയുള്ള അതിക്രമങ്ങള്‍ തടയണമെന്ന ആവശ്യമുന്നയിച്ച് അഴീക്കോട്ടെ പൊതു പ്രവര്‍ത്തകര്‍ രംഗത്ത് വന്നിട്ടുണ്ട്.