ചെറുതുരുത്തി: വനിതാ മതിലില്‍ പങ്കെടുക്കാത്തതിന്റെ പേരില്‍ വള്ളത്തോള്‍ നഗര്‍ പഞ്ചായത്തിലെ അഞ്ച് വാര്‍ഡുകളില്‍ ഉള്‍പ്പെടുന്ന 160 തൊഴിലുറപ്പ് തൊഴിലാളികള്‍ക്ക് ജോലി നിഷേധിച്ച സംഭവത്തില്‍ ഭരണ പ്രതിപക്ഷ പോര് രൂക്ഷമാകുന്നു.
തൊഴില്‍ നിഷേധിച്ചതില്‍ പ്രതിഷേധിച്ച് പഞ്ചായത്ത് ഓഫിസിലേക്ക് കഴിഞ്ഞ ദിവസം വനിതാ തൊഴിലാളികള്‍ കൂട്ടമായെത്തി ഒരു ദിനം മുഴുവന്‍ പ്രതിഷേധിച്ചിരുന്നു. പഞ്ചായത്ത് സെക്രട്ടറി ഇന്നലെ മുതല്‍ ജോലി നല്‍കാമെന്ന് ഉറപ്പു നല്‍കുകയും ചെയ്തിരുന്നു. എന്നാല്‍, തീരുമാനം നടപ്പായില്ല.
പന്ത്രണ്ടാം വാര്‍ഡിലെ 79 തൊഴിലാളികള്‍ ജോലിക്ക് എത്തിയപ്പോള്‍ മേറ്റ് രജിസ്റ്ററില്‍ ഒപ്പ് വയ്ക്കാന്‍ അനുവദിച്ചില്ല.
ജനുവരിയില്‍ നടന്ന വനിതാ മതിലില്‍ പങ്കെടുക്കാത്തവരെ തൊഴിലില്‍ നിന്ന് മാറ്റി നിര്‍ത്താന്‍ നിര്‍ദേശമുണ്ടെന്ന് അറിയിക്കുകയായിരുന്നു.
തൊഴില്‍ നിഷേധിക്കപ്പെട്ടവരുടെ അറിയിപ്പിനെ തുടര്‍ന്ന് സ്ഥലത്തെത്തിയ വാര്‍ഡ് മെംബര്‍ വി. നാരായണന്‍ ഹാജര്‍ ബുക്ക് മേറ്റില്‍ നിന്ന് വാങ്ങുകയും ജോലി നിര്‍ത്തിവയ്ക്കാന്‍ ആവശ്യപ്പെടുകയും ചെയ്തു.
എല്ലാ തൊഴിലാളികള്‍ക്കും ജോലി നല്‍കുന്നെങ്കില്‍ മാത്രം പണി തുടര്‍ന്നാല്‍ മതി എന്ന് നിര്‍ദേശവും നല്‍കി.
ഇതോടെ പണികള്‍ സ്തംഭിയ്ക്കുകയും ചെയ്തു. പഞ്ചായത്ത് ഭരണസമിതിയുടെ പിടിവാശി മുഴുവന്‍ തൊഴിലാളി കുടുംബങ്ങളേയും പട്ടിണിയിലേക്ക് നയിക്കുന്ന അവസ്ഥയാണെന്ന് തൊഴിലാളികള്‍ പറയുന്നു. ഇതിനെതിരേ പ്രതിഷേധവും കനക്കുകയാണ്.