കൊപ്പം: കഴിഞ്ഞ പ്രളയകാലത്ത് പുഴയിലേക്ക് കടപുഴകിവീണ വൈദ്യുത കാലുകളും കമ്പികളും മാസങ്ങളായിട്ടും പുഴയില്‍നിന്നും മാറ്റിയില്ല. തൂതപ്പുഴയുടെ കണ്ടേങ്കാവ്, ചെമ്മല കടവുകളിലാണ് വെള്ളത്തില്‍ മാസങ്ങളായി പൊട്ടിവീണ വൈദ്യുത കമ്പികളും കാലുകളും കിടക്കുന്നത്. കഴിഞ്ഞ ഓഗസ്റ്റ് മാസത്തിലുണ്ടായ മഹാപ്രളയത്തില്‍ പൊട്ടിവീണ 110 കെ.വി ലൈനിന്റെ കമ്പികളാണിത്. ഇവ കുളിക്കടവിനോട് ചേര്‍ന്ന് കിടക്കുന്നതിനാല്‍ പുഴയിലേക്ക് ഇറങ്ങുന്നവര്‍ക്ക് ദുരിതമായിട്ടുണ്ട്.
പ്രളയകാലത്ത് കരയിടിഞ്ഞതോടൊപ്പം പുഴയിലേക്ക് പതിച്ച വൈദ്യുത കാലുകള്‍ക്ക് പകരം അധികൃതര്‍ പുതിയവ സ്ഥാപിച്ചിരുന്നുവെങ്കിലും പഴയത് വെള്ളത്തില്‍ തന്നെ ഉപേക്ഷിക്കുകയായിരുന്നു. കണ്ടേങ്കാവ് കടവിലുള്ളത് കൊപ്പം സെക്ഷനു കീഴിലും ചെമ്മല കടവിലുള്ളത് പുലാമന്തോള്‍ സെക്ഷന് കീഴിലുമാണ്. പുഴയില്‍ വെള്ളം കുറഞ്ഞതോടെ പുഴയിലേക്ക് ഇറങ്ങുന്നവര്‍ക്ക് ഭീഷണിയായിരിക്കുകയാണ് ഈ കമ്പികളും കാലുകളും.