ബെയ്ജിങ്: വിദേശ രാജ്യങ്ങളില്‍ നിന്നെത്തുന്നവര്‍ക്ക് കൊവിഡ് വൈറസ് സ്ഥിരീകരിക്കപ്പെടുന്ന സാഹചര്യത്തില്‍ ക്വാറന്റൈന്‍ ചെലവ് അവര്‍ തന്നെ വഹിക്കേണ്ടി വരുമെന്ന് ചൈന.
ശനിയാഴ്ച അര്‍ധരാത്രി മുതല്‍ രാജ്യത്തെത്തുന്ന വിദേശികള്‍ക്ക് ഇത് ബാധരമായിരിക്കും. ചൈനയില്‍ കഴിഞ്ഞദിവസം പുതുതായി സ്ഥിരീകരിച്ച കൊവിഡ് കേസുകളില്‍ 16ഉം വിദേശ രാജ്യങ്ങളില്‍ നിന്നുള്ളവരായിരുന്നു. ഇതേത്തുര്‍ന്നാണ് ചൈനയുടെ പുതിയ നീക്കം.
ഇന്നു മുതല്‍ രാജ്യത്തെത്തുന്ന എല്ലാ വിദേശ യാത്രക്കാരെയും 14 ദിവസം നിരീക്ഷണത്തിലാക്കും. ആരോഗ്യ പ്രശ്‌നങ്ങള്‍ മറച്ചുവച്ച് രാജ്യത്തെത്തുന്നവരില്‍ നിന്ന് പിഴ ഈടാക്കുകയും ചെയ്യും. ഇതുവരെ ചൈനയിലെത്തിയ 111 വിദേശികള്‍ക്ക് കൊവിഡ് സ്ഥിരീകരിച്ചതായാണ് വിവരം.
എന്നാല്‍ ചൈനയില്‍ വൈറസിന്റെ പ്രഭവ കേന്ദ്രമായ ഹൂബേ പ്രവിശ്യയില്‍ വുഹാന്‍ ഒഴികെയുള്ള 16 സിറ്റികളില്‍ നിന്നു കഴിഞ്ഞ ദിവസം ഒരു കേസു പോലും റിപ്പോട്ട് ചെയ്യപ്പെട്ടിരുന്നില്ല. 10 മരണങ്ങളാണ് പുതുതായി റിപ്പോര്‍ട്ട് ചെയ്യപ്പെട്ടത്. ആകെ മരണം 3,199 ആയി ഉയര്‍ന്നു. 80,844 പേര്‍ക്കാണ് ചൈനയില്‍ വൈറസ് സ്ഥിരീകരിച്ചത്.