കൊണ്ടോട്ടി:കൊവിഡ് 19നെ തുടര്‍ന്ന് വിമാന സര്‍വിസുകള്‍ സഊദി അറേബ്യ നിര്‍ത്തിയതോടെ ഞായറാഴ്ച കരിപ്പൂരില്‍ നിന്ന് ജിദ്ദ,റിയാദ് മേഖലയിലേക്കുളള യാത്രക്കാരുടെ യാത്ര മുടങ്ങി.ഇന്നലെ മൂന്ന് വിമാനങ്ങളാണ് സഊദിയിലേക്ക് ഷെഡ്യൂള്‍ ചെയ്തിരുന്നത്.പുലര്‍ച്ചെ 4.50ന് സ്‌പൈസ്‌ജെറ്റ്,സഊദി എയര്‍ലൈന്‍സിന്റെ രാവിലെ 9.15നുളള റിയാദ്,11.30നുളള ജിദ്ദ സര്‍വിസുകളാണ് മുടങ്ങിയത്.
യാത്രക്കായി വിമാനത്താവളത്തിലെത്തിയപ്പോഴാണ് വിമാനം കാലിയായാണ് പറക്കുന്നതെന്ന് ബോധ്യമായത്.മൂന്ന് വിമാനങ്ങളും ഞായറാഴ്ച കരിപ്പൂരിലെത്തിയെങ്കിലും വിലക്ക് നിലവില്‍ വന്നതോടെ മടങ്ങുകയായിരുന്നു. 280 പേരാണ് ജിദ്ദ വിമാനത്തില്‍ ടിക്കറ്റ് ബുക്ക് ചെയ്തിരുന്നത്.യാത്രക്കാര്‍ കൂടുതലുളളതിനാല്‍ ജിദ്ദയിലേക്ക് 413 പേര്‍ക്ക് സഞ്ചരിക്കാവുന്ന ബി 777-300 ഇ.ആര്‍ വിമാനമാണ് സര്‍വിസിന് എത്തിച്ചിരുന്നത്.
തിങ്കളാഴ്ച രാവിലെ 7.05നുളള എയര്‍ഇന്ത്യയുടെ ജിദ്ദ-കരിപ്പൂര്‍ വിമാനം ഞായറാഴ്ച തന്നെ സര്‍വിസ് നടത്തി.ഈ വിമാനത്തിന്റെ ജിദ്ദ-ഹൈദരാബാദ് സര്‍വിസ് കരിപ്പൂര്‍ വഴിയാണ് നടത്തിയത്.