മൂന്നാറിലെ വിനോദസഞ്ചാരം 31 വരെ നിരോധിച്ചു
തൊടുപുഴ: കൊറോണ വൈറസ് ബാധിച്ച ബ്രിട്ടിഷ് പൗരന്‍ മൂന്നാറിലെ സര്‍ക്കാര്‍ റിസോര്‍ട്ടില്‍ നിന്നും കടന്നുകളഞ്ഞത് ഗുരുതര വീഴ്ച.. കൊവിഡ് 19 വ്യാപനം തടയാന്‍ സംസ്ഥാന സര്‍ക്കാര്‍ ശക്തമായ പ്രതിരോധം തീര്‍ത്തിരിക്കെയാണ് ശനിയാഴ്ച രാത്രി 10.30ഓടെ കെ ടി ഡി സിയുടെ മൂന്നാറിലെ ആഡംബര റിസോര്‍ട്ടായ ടീ കൗണ്ടിയില്‍ നിന്നും രോഗിയായ 57 കാരന്‍ അടങ്ങുന്ന 19 അംഗ ബ്രിട്ടീഷ് സംഘം ട്രാവല്‍ ഏജന്റിന്റെ സഹായത്തോടെ കടന്നുകളഞ്ഞത്. പിന്നീട് ഇവരെ നെടുമ്പാശേരി വിമാനത്താവളത്തില്‍ നിന്നും പിടികൂടിയെങ്കിലും സംഭവത്തിലെ ഗുരുതര വീഴചയെച്ചൊല്ലി ആരോഗ്യവകുപ്പും കെ.ടി.ഡി.സിയും പരസ്പരം പഴിചാരുകയാണ്. പരിശോധനാ ഫലം നെഗറ്റീവ് ആണെന്ന ആരോഗ്യവകുപ്പിന്റെ റിപ്പോര്‍ട്ടിന്റെ അടിസ്ഥാനത്തില്‍ ഇവരെ കാര്യമായി ശ്രദ്ധിച്ചില്ലെന്ന് റിസോര്‍ട്ട അധികൃതര്‍ പറയുന്നുണ്ട്. എന്നാല്‍ ഇവരെ അന്തിമഫലം വരും വരെ തടഞ്ഞുവെക്കണമെന്ന് കര്‍ശന നിര്‍ദേശം നല്‍കിയിരുന്നതായി ആരോഗ്യ വകുപ്പ് വാദിക്കുന്നു. രോഗം സ്ഥിരീകരിച്ചുളള പോസീറ്റീവ് പരിശോധനാ ഫലം രാത്രി വൈകിയാണ് സംസ്ഥാന ആരോഗ്യ വകുപ്പിന് ലഭിച്ചത്. അപ്പോഴേക്കും ഇവര്‍ മൂന്നാര്‍ വിട്ടിരുന്നു. ടീ കൗണ്ടി മാനേജര്‍ അടക്കമുളള 40 ജീവനക്കാരെ അവിടെ നീരീക്ഷണത്തില്‍ പാര്‍പ്പിച്ചിരിക്കുകയാണ്. നെടുമ്പാശേരി വിമാനത്താവളം വരെ രോഗിയടങ്ങുന്ന സംഘം സഞ്ചരിച്ചതിന്റെ റൂട്ട് മാപ്പ് പുറത്തുവിട്ടു. എല്ലായിടത്തും നിരീക്ഷണവും പരിശോധനയും നടത്തും. ഉദ്യോഗസ്ഥ തല വീഴ്ച അന്വേഷിക്കും.
കഴിഞ്ഞ ആറിന് കേരളത്തിലെത്തിയ സംഘം 10നാണ് മൂന്നാറില്‍ വന്നത്. 35കാരനായ ഒരാളൊഴികെ സംഘത്തിലെ 18 പേരും 50നും 70നും ഇടയില്‍ പ്രായമുളളവരാണ്. വിനോദസഞ്ചാരിക്ക് കൊവിഡ് സ്ഥിരീകരിച്ചതോടെ മൂന്നാര്‍ മേഖലയാകെ ഭീതിയിലായി. മൂന്നാറിലെ വിനോദസഞ്ചാരം 31 വരെ നിരോധിച്ച ജില്ലാ കലക്ടര്‍ എല്ലാ ടൂറിസം പാര്‍പ്പിടങ്ങളും അടച്ചിടാന്‍ നിര്‍ദേശം നല്‍കി. മന്ത്രി എം എം മണിയുടെ നേതൃത്വത്തില്‍ അടിയന്തിര യോഗം ചേര്‍ന്നു. ചിത്തിരപുരത്ത് ഐസോലേഷന്‍ വാര്‍ഡ് പ്രവര്‍ത്തനം ആരംഭിച്ചു. പ്രത്യേക മെഡിക്കല്‍ സംഘത്തിന് രൂപം നല്‍കി.
മൂന്നാറില്‍ തങ്ങുന്ന വിനോദ സഞ്ചാരികളുടെ വിവരങ്ങള്‍ ആരോഗ്യ വകുപ്പിന് കൈമാറി. മൂന്നാറിലെ പ്രദേശവാസികളെയും നിരീക്ഷിക്കുമെന്നും ആശങ്കപ്പെടേണ്ട സാഹചര്യം നിലവില്ലെന്നും ജില്ലാ കലക്ടര്‍ എച്ച് ദിനേശന്‍ അറിയിച്ചു.