തൊടുപുഴ:പട്ടയം കവല, മുതലക്കോടം ഭാഗത്ത് വ്യാപകമായി പാടം നികത്തുന്നതായി ആക്ഷേപം ഉയരുന്നു.അധികൃതരുടെ ഒത്താശയോടെയാണ് പാടം നികത്തലെന്ന ആരോപണവും ഉയരുന്നുണ്ട്.
രാത്രി സമയങ്ങളില്‍ ടോറസ് ലോറികളിലാണ് മണ്ണ് കൊണ്ടുവന്ന് പാടം നികത്തുന്നത്. ടോറസ് ലോറികളില്‍ മണ്ണ് കൊണ്ടുവരുന്നതിനാല്‍ മറ്റുള്ളവരുടെ ശ്രദ്ധയില്‍പ്പെടാനുള്ള സാധ്യതയും കുറവാണ്.റോഡില്‍ വാഹനങ്ങളുടെ തിരക്ക് കുറയുമ്പോഴാണ് മണ്ണ്മാഫിയ പാടംനികത്തല്‍ ആരംഭിക്കുന്നത്.ഒറ്റ രാത്രി കൊണ്ടുതന്നെ ഏക്കര്‍ കണക്കിനു പാടം നികത്തും.
പൊളിച്ചു നീക്കുന്ന കെട്ടിടങ്ങളുടെയും വീടുകളുടെയും അവശിഷ്ടങ്ങളും മറ്റും കൊണ്ടുവന്നും പാടത്ത് നിക്ഷേപിക്കുകയാണ് ഇവരുടെ രീതി. ആരുടെയും ശ്രദ്ധയില്‍പ്പെടാതിരിക്കാന്‍ ഇടവിട്ട ദിവസങ്ങളിലും അവധി ദിവസങ്ങളുടെ മറവിലുമാണ് പാടം നികത്തല്‍ നടത്തുന്നത്. രണ്ടാഴ്ച മുമ്പ് മുതലക്കോടം ഭാഗത്തു നിന്നു പാടം നികത്തുന്നതിനായി മണ്ണുകൊണ്ടുവന്ന രണ്ടു ടിപ്പര്‍ ലോറികള്‍ അധികൃതര്‍ കസ്റ്റഡിയിലെടുത്തിരുന്നു.
സമീപ നാളില്‍ തൊടുപുഴ മേഖലയില്‍ പാടം നികത്തല്‍ വ്യാപകമായിരിക്കുകയാണ്.ഇക്കാര്യത്തില്‍ അധികൃതര്‍ ആവശ്യമായ നടപടി സ്വീകരിക്കണമെന്ന ആവശ്യമുയരുന്നുണ്ട്.