ജിദ്ദ: ഹൃദയാഘാതത്തെത്തുടര്‍ന്ന് സഊദിയില്‍ കഴിഞ്ഞ മാസം മരിച്ച മലയാളിയുടെ കുടുംബത്തെ ഇനി സ്‌പോണ്‍സര്‍ സംരക്ഷിക്കും.പത്തനാപുരം കലഞ്ഞൂര്‍ ഇടത്തറ വെണ്‍മണി പുരയിടം നാസറിന്റെ(61) സ്‌പോണ്‍സറായ ദലീല്‍ അല്‍ ഉതൈബിയാണു നാസറിന്റെ കുടുംബത്തിനു ഒരു നിശ്ചിത കാലം വരെ ധനസഹായം നല്‍കുമെന്ന് നാസറിന്റെ സുഹൃത്തുക്കളെ അറിയിച്ചത്.

 

കഴിഞ്ഞ മാസം 23 നു മഹാസിനില്‍ വെച്ച് മരിച്ച നാസറിന്റെ മൃതദേഹം കഴിഞ്ഞ ദിവസം നാട്ടിലെത്തിച്ച് മറവ് ചെയ്തിരുന്നു. മയ്യിത്ത് നാട്ടിലെത്തിക്കാനുള്ള മുഴുവന്‍ ചെലവും നാസറിന്റെ കഫീലായ ദലീല്‍ ഉതൈബി തന്നെയായിരുന്നു വഹിച്ചിരുന്നത്.

 

മഹാസിനില്‍ കഴിഞ്ഞ 30 വര്‍ഷമായി പ്ലംബിംഗ് ജോലികള്‍ ചെയ്ത് വരുന്ന നാസറുമായി സ്‌പോണ്‍സര്‍ വളരെ അടുത്ത ബന്ധമായിരുന്നു പുലര്‍ത്തിയിരുന്നത്.

കഴിഞ്ഞ ദിവസം ഇടത്തറ മസ്ജിദ് ഖബറിസ്ഥാനിലായിരുന്നു മയ്യിത്ത് ഖബറടക്കിയത്. നാസറിനു ഭാര്യയും മൂന്ന് പെണ്‍കുട്ടികളുമാണുള്ളത്.