തിരുവനന്തപുരം: കേന്ദ്ര സംസ്ഥാന സര്‍ക്കാരുകളുടെ ജനദ്രോഹഭരണം തുറന്നുകാട്ടുന്നതിനായി കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ നടത്തുന്ന ജനമഹായാത്ര ഇന്ന് ആരംഭിക്കും.

കാസര്‍കോട്ടുനിന്നും ആരംഭിക്കുന്ന യാത്ര 28ന് തിരുവനന്തപുരത്ത് സമാപിക്കും. നായന്‍മാര്‍മൂലയില്‍നിന്നും കോണ്‍ഗ്രസ് പ്രവര്‍ത്തക സമിതി അംഗം എ.കെ ആന്റണി പാര്‍ട്ടി പതാക മുല്ലപ്പള്ളി രാമചന്ദ്രന് കൈമാറി ജനമഹായാത്ര ഉദ്ഘാടനം ചെയ്യും. മുന്‍ മുഖ്യമന്ത്രിയും എ.ഐ.സി.സി ജനറല്‍ സെക്രട്ടറിയുമായ ഉമ്മന്‍ചാണ്ടി, പ്രതിപക്ഷ നേതാവ് രമേശ് ചെന്നിത്തല, എ.ഐ.സി.സി ജനറല്‍ സെക്രട്ടറി കെ.സി വേണുഗോപാല്‍, കോണ്‍ഗ്രസ് പ്രവര്‍ത്തക സമിതി അംഗം പി.സി ചാക്കോ, കെ.പി.സി.സി വര്‍ക്കിങ് പ്രസിഡന്റുമാരായ കെ. സുധാകരന്‍, കൊടിക്കുന്നില്‍ സുരേഷ്, ജാഥാ കോഡിനേറ്ററും യു.ഡി.എഫ് കണ്‍വീനറുമായ ബെന്നി ബഹനാന്‍, എം.എം ഹസന്‍, തമ്പാനൂര്‍ രവി, വി.എം സുധീരന്‍ തുടങ്ങിയ നേതാക്കള്‍ പങ്കെടുക്കും.

നാളെ രാവിലെ 10ന് ഉദുമയില്‍നിന്നും പര്യടനം തുടങ്ങി വൈകിട്ട് മൂന്നിന് തൃക്കരിപ്പൂരിലെ സ്വീകരണത്തിനുശേഷം കണ്ണൂര്‍ ജില്ലയില്‍ പ്രവേശിക്കും. അഞ്ചിനും ആറിനും ജനമഹായാത്ര കണ്ണൂര്‍ ജില്ലയിലെ പര്യടനം പൂര്‍ത്തിയാക്കി വൈകിട്ടോടെ വയനാട് ജില്ലയില്‍ പ്രവേശിക്കും. മാനന്തവാടി, സുല്‍ത്താന്‍ബത്തേരി, കല്‍പ്പറ്റ എന്നിവിടങ്ങളിലെ സ്വീകരണത്തോടെ വയനാട് ജില്ലയിലെ പര്യടനം പൂര്‍ത്തിയാക്കും. ഏഴിന് യാത്ര കോഴിക്കോട്ട് പര്യടനം ആരംഭിക്കും. എട്ടിന് കോഴിക്കോട് ജില്ലയിലെ പര്യടനം പൂര്‍ത്തിയാക്കി ഒന്‍പതിന് മലപ്പുറം ജില്ലയിലെ പര്യടനത്തിന് തുടക്കം കുറിക്കും.

10, 11 തിയതികളില്‍ മലപ്പുറം ജില്ലയിലെ പത്തോളം വേദികളില്‍ സ്വീകരണം ഏറ്റുവാങ്ങി വൈകിട്ടോടെ പാലക്കാട് ജില്ലയില്‍ പ്രവേശിക്കും. തൃത്താലയാണ് ആദ്യസ്വീകരണം. പട്ടാമ്പിയില്‍ യാത്ര പൂര്‍ത്തിയാക്കിയ ശേഷം 12ന് ഷൊര്‍ണ്ണൂരില്‍നിന്നും പര്യടനം ആരംഭിക്കും. 13ന് ജനമഹായാത്ര പാലക്കാട് ജില്ലയില്‍ പര്യടനം പൂര്‍ത്തിയാക്കി വൈകിട്ടോടെ തൃശൂര്‍ ജില്ലയില്‍ പ്രവേശിക്കും.

ചേലക്കര, വടക്കാഞ്ചേരി എന്നിവിടങ്ങളിലാണ് ആദ്യ സ്വീകരണ വേദികള്‍. 14നും 15നും തൃശൂര്‍, 16, 18, 19 ദിവസങ്ങളില്‍ എറണാകുളം ജില്ലയുടെ വിവിധ ഭാഗങ്ങളിലും പര്യടനം നടത്തും. 17ന് യാത്രയില്ല. 19ന് വൈകിട്ട് മൂന്നിന് അടിമാലിയില്‍നിന്നും ഇടുക്കി ജില്ലയിലെ പര്യടനത്തിന് തുടക്കം കുറിക്കും. 20നും ഇടുക്കിയില്‍ പര്യടനം നടത്തും.
തുടര്‍ന്ന് വൈകിട്ടോടെ കോട്ടയം ജില്ലയില്‍ പ്രവേശിക്കും. മൂന്നിടങ്ങളിലെ സ്വീകരണത്തിനുശേഷം 21നും കോട്ടയം ജില്ലയിലെ വിവിധ ഭാഗങ്ങളില്‍ യാത്ര പര്യടനം നടത്തും. 22, 23 ദിവസങ്ങളില്‍ ആലപ്പുഴ ജില്ലയിലെ പര്യടനം പൂര്‍ത്തിയാക്കി 23ന് വൈകിട്ടോടെ പത്തനംതിട്ടയില്‍ പ്രവേശിക്കും.
24ന് അവധി. 25ന് വീണ്ടും പത്തനംതിട്ടയില്‍നിന്നും യാത്ര തുടങ്ങി വൈകിട്ടോടെ കൊല്ലം ജില്ലയില്‍ പ്രവേശിക്കും. 26ന് കൊല്ലത്ത് പര്യടനം പൂര്‍ത്തിയാക്കി 27ന് തിരുവനന്തപുരം ജില്ലയില്‍ പ്രവേശിക്കും. 28ന് തിരുവനന്തപുരത്ത് ജാഥ സമാപിക്കും.