ന്യൂഡല്‍ഹി: നാടകീയ സംഭവങ്ങള്‍ക്കിടെ മധ്യപ്രദേശില്‍ വിശ്വാസ വോട്ടെടുപ്പ് നടത്താതെ കമല്‍നാഥ് സര്‍ക്കാര്‍. കൊറോണ വൈറസ് ബാധയുടെ പശ്ചാത്തലത്തില്‍ നിയമസഭാ സമ്മേളനം ഈ മാസം 26ലേക്ക് മാറ്റി. തൊട്ടു പിന്നാലെ ഉടന്‍ വിശ്വാസ വോട്ടെടുപ്പ് നടത്താന്‍ നിര്‍ദേശം നല്‍കണമെന്നാവശ്യപ്പെട്ട് ബി.ജെ.പി സുപ്രിം കോടതിയെ സമീപിച്ചു. അതോടൊപ്പം ഇന്ന് തന്നെ വിശ്വാസ വോട്ടെടുപ്പ് നേരിടാനും അല്ലെങ്കില്‍ സര്‍ക്കാരിന് ഭൂരിപക്ഷം ഇല്ലെന്ന് കണക്കാക്കി ശക്തമായ നടപടി സ്വീകരിക്കുമെന്നും ഗവര്‍ണര്‍ ലാല്‍ജി ടണ്ടര്‍ മുന്നറിയിപ്പ് നല്‍കി. ബി.ജെ.പിയുടെ ഹരജി സുപ്രിം കോടതി ഇന്ന് തന്നെ പരിഗണിക്കുന്നുണ്ട്.
തിങ്കളാഴ്ച അസംബ്ലി ചേര്‍ന്ന് വിശ്വാസ വോട്ടെടുപ്പ് നടത്താനായിരുന്നു കമല്‍നാഥ് സര്‍ക്കാറിന് ഗവര്‍ണര്‍ നിര്‍ദേശം നല്‍കിയിരുന്നത്. ഇന്നലെ സഭാ സമ്മേളനം ചേര്‍ന്നെങ്കിലും നടപടികളുടെ കൂട്ടത്തില്‍ വിശ്വാസ വോട്ടെടുപ്പ് ഉള്‍പ്പെടുത്തിയിരുന്നില്ല. കര്‍ണാടകയില്‍ കഴിയുന്ന വിമത കോണ്‍ഗ്രസ് എം.എല്‍.എമാര്‍ ഇന്നലെ സഭയില്‍ ഹാജരായുമില്ല. തങ്ങളുടെ ഏതാനും എം.എല്‍.എമാരെ ബന്ദികളാക്കി വച്ചിരിക്കുന്ന സാഹചര്യത്തില്‍ വിശ്വാസ വോട്ടെടുപ്പ് നീട്ടിവയ്ക്കണമെന്ന് കാലത്ത് തന്നെ കമല്‍നാഥ് ഗവര്‍ണറോട് ആവശ്യപ്പെട്ടിരുന്നു. എം.എല്‍.എമാരെ നിര്‍ബന്ധിച്ച് വീഡിയോ പ്രസ്താവന ചിത്രീകരിച്ചതാണ്. സമ്മര്‍ദ്ദമില്ലാത്ത സ്വതന്ത്ര സാഹചര്യത്തിലായിരിക്കണം വിശ്വാസവോട്ടെടുപ്പ് നടത്തേണ്ടതെന്ന് ഗവര്‍ണര്‍ക്കെഴുതിയ കത്തില്‍ കമല്‍നാഥ് ആവശ്യപ്പെട്ടു.
സഭ തുടങ്ങിയതോടെ സര്‍ക്കാറിന്റെ നയപ്രഖ്യാപന പ്രസംഗം പൂര്‍ണമായും വായിക്കാന്‍ ഗവര്‍ണര്‍ തയാറായില്ല. ഭരണഘടനാപരമായ ബാധ്യത നിര്‍വഹിക്കാന്‍ എല്ലാവരും തയാറാകണമെന്ന നിര്‍ദേശമാണ് ഗവര്‍ണര്‍ എം.എല്‍.എമാര്‍ക്ക് നല്‍കിയത്. പിന്നാലെ, കൊറോണ വൈറസ് ബാധയുടെ പശ്ചാത്തലത്തില്‍ സമ്മേളനം 26വരെ നീട്ടിവയ്ക്കുന്നതായി സ്പീക്കര്‍ അറിയിച്ചു. അതിനു പിന്നാലെ ബി.ജെ.പി സുപ്രിം കോടതിയെ സമീപിക്കുകയായിരുന്നു. മുന്‍ മുഖ്യമന്ത്രി ശിവരാജ് സിങ് ചൗഹാനും മറ്റ് ഒന്‍പത് എം.എല്‍.എമാരുമാണ് സുപ്രിം കോടതിയെ സമീപിച്ചത്.
22 എം.എല്‍.എമാര്‍ രാജി സമര്‍പ്പിച്ചതിനാല്‍ കോണ്‍ഗ്രസ് സര്‍ക്കാരിന് സഭയില്‍ ഭൂരിപക്ഷം നഷ്ടപ്പെട്ടതായി ഹരജിയില്‍ പറയുന്നു. ഇതില്‍ ആറു പേരുടെ രാജി സ്പീക്കര്‍ അംഗീകരിച്ചിട്ടുണ്ട്. ഈ സാഹചര്യത്തില്‍ ഒരു ദിവസംപോലും അധികാരത്തില്‍ തുടരാന്‍ കമല്‍നാഥ് സര്‍ക്കാറിന് നിയമപരമായോ, ധാര്‍മികമായോ, ജനാധിപത്യപരമായോ അവകാശമില്ല. വിശ്വാസ വോട്ടെടുപ്പ് നീളുന്നത് കുതിരക്കച്ചവടത്തിനിടയാക്കുമെന്നും ഹരജിയില്‍ പറയുന്നു. കര്‍ണാടക, മഹാരാഷ്ട്ര സഭകളിലുണ്ടായ സമാനമായ സാഹചര്യത്തില്‍ സുപ്രിം കോടതിയുടെ വിധികളും ഹരജിയില്‍ ചൂണ്ടിക്കാട്ടിയിട്ടുണ്ട്.