കല്ലമ്പലം: ഡ്രൈ ഡേ ദിനം ഓട്ടോറിക്ഷയില്‍ വിദേശമദ്യം വില്‍പന നടത്തിവന്നയാളെ പിടികൂടാനെത്തിയ എക്‌സൈസ് സംഘത്തെ ഓട്ടോ ഇടിച്ച് കൊലപ്പെടുത്താന്‍ ശ്രമിച്ച പ്രതിയെ കിളിമാനൂര്‍ എക്‌സൈസ് സംഘം കസ്റ്റഡിയിലെടുത്തു. പോങ്ങനാട് ആലത്തുകാവ് അക്കരവിളവീട്ടില്‍ സൂരജ് (37)നെയാണ് പിടികൂടിയത്. പ്രതി മുന്‍പ് നിരവധി അബ്കാരി കേസുകളില്‍ പ്രതിയാണെന്ന് എക്‌സൈസ് അറിയിച്ചു. വിദേശമദ്യ കുപ്പികളുമായി ഓട്ടോറിക്ഷയില്‍ കിളിമാനൂര്‍, കക്കാക്കുന്ന് ഭാഗങ്ങളില്‍ ആവശ്യക്കാര്‍ക്ക് വില്‍പന നടത്തിവരുകയായിരുന്നു.
പ്രതി ആലത്ത്കാവിലുണ്ടെന്ന രഹസ്യവിവരത്തെ തുടര്‍ന്ന് കിളിമാനൂര്‍ എക്‌സൈസ് ഇന്‍സ്‌പെക്ടര്‍ എസ്.പി അനില്‍കുമാറിന്റെ നേതൃത്വത്തില്‍ സ്ഥലത്തെത്തിയ എക്‌സൈസ് സംഘത്തെ പ്രതി ഓട്ടോ വേഗതയില്‍ എടുത്ത് എക്‌സൈസ് സംഘത്തെ ഇടിച്ചിട്ട് രക്ഷപ്പെടാന്‍ ശ്രമിക്കുകയാരുന്നു. എന്നാല്‍, എക്‌സൈസ് സംഘത്തെ ഇടിച്ച് നിയന്ത്രണം വിട്ട ഓട്ടോ നടുറോഡില്‍ മറിഞ്ഞ് പ്രതി സൂരജിനും പരിക്കേറ്റു. എക്‌സൈസ് സി.ഇ.ഒമാരായ ആദര്‍ശ്, അനീഷ് എന്നിവര്‍ക്കും സാരമായ പരുക്കേറ്റ. പരുക്കേറ്റ മൂവരെയും കേശവപുരം ആശുപത്രിയില്‍ പ്രാഥമിക ചികിത്സ നല്‍കി മെഡിക്കല്‍ കോളജില്‍ വിഗദ്ധ ചികിത്സക്കായി കൊണ്ടുപോയി. പ്രതി സൂരജിനെതിരേ അബ്കാരി നിയമ പ്രകാരം കേസെടുത്ത് കോടതിയില്‍ ഹാജരാക്കി റിമാന്‍ഡ് ചെയ്തു.