റിയാദ്: കോവിഡ് 19 വൈറസ് ബാധ വ്യാപനം തടയുന്നതിന്റെ ഭാഗമായി ഏർപ്പെടുത്തിയ നടപടികൾ വിവിധ മേഖലകളെ തകിടം മറിക്കുന്നു. ഉംറയും വിസിറ്റിങ്ങും നിർത്തലാക്കിയതോടെ മക്കയിലെ ടൂറിസം രംഗം ആകെ പ്രതിസന്ധിയിലാണ്. പ്രാദേശിക ഉംറയും നിർത്തലാക്കിയതോടെ മക്കയിലെ ആയിരക്കണക്കിന് ഹോട്ടൽ ഉടമകൾ നെട്ടോട്ടമോടുകയാണ്. ഇതോടനുബന്ധിച്ചുള്ള മറ്റു ബിസിനസ് മേഖലകളും പിടിച്ചു നിൽക്കാനാകാതെ ആകെ പ്രയാസത്തിലാണ്. അടുത്തിടെ വരാനിരിക്കുന്ന വിശുദ്ധ റമദാനിലെ ഉംറ സീസൺ മുന്നിൽ കണ്ടു ഹോട്ടൽ കെട്ടിടടങ്ങൾ വാടകക്കെടുത്ത് തയ്യാറായവരും ആകെ പ്രതിസന്ധിയിലായി. നിലവിലെ അവസ്ഥയിൽ റമദാനിലും ഉംറ അനുവദിക്കുമോയെന്ന കാര്യത്തിൽ സംശയമാണ്. ഇതേ തുടർന്ന് പല ബിസിനസ് സ്ഥാപനങ്ങളും ജീവനക്കാർക്ക് നിർബന്ധിത അവധി നൽകിയിട്ടുണ്ട്.
    മക്കയിലെ ബിസിനസ് മേഖല മുഴുവൻ ഇവിടെയെത്തുന്ന സ്വദേശ, വിദേശ ഉംറ തീർത്ഥാടകരെ ആശ്രയിച്ചാണ് കഴിയുന്നത്. ഉംറ തീർത്ഥാടകർക്ക് വിലക്കേർപ്പെടുത്തിയതോടെ ബിസിനസ് മേഖല മുഴുവൻ പൂർണ്ണ തകർച്ചയുടെ വക്കിലാണ്. കോവിഡ് 19 വൈറസ് മൂലം രാജ്യത്താകമാനം ബിസിനസ് രംഗത്ത് മുരടിപ്പ് അനുഭവപ്പെട്ടിട്ടുണ്ടെങ്കിലും മക്കയിലും മദീനയിലും പൂർണമായും ഇത് പൂർണ്ണമാണ്. പലർക്കും ദിനേനയുള്ള ചിലവുകൾ നടന്നു പോകുന്നതിനുള്ളത് പോലും ഇവിടെ നിന്നും ലഭിക്കുന്നില്ല. മക്കയിലെ വൻകിട ഹോട്ടൽ സമുച്ചയങ്ങളും കെട്ടിടങ്ങളും പൂർണ്ണമായും കാലിയായതോടെ നിക്ഷേപകരും കടുത്ത ആശങ്കയിലാണ്. ഇതോടൊപ്പം മക്കയിലെ കഫ്‌തീരിയ, റെസ്റ്റോറന്റുകൾ തുടങ്ങിയ ബിസിനസ് രംഗവും ആകെ പ്രതിസന്ധി നേരിടുന്നുണ്ട്. പലരും ഇതിനകം തന്നെ അടച്ചു പൂട്ടുകയും ചെയ്‌തിട്ടുണ്ട്‌. മലയാളികളടക്കം നിരവധി വിദേശികളാണ് ഇത്തരം സംരംഭങ്ങളുമായി ഇവിടെ കഴിയുന്നത്.
    അതോടൊപ്പം ട്രാവൽ ടൂറിസം രംഗവും ആകെ പ്രതിസന്ധിയിലായി. കൊറോണ വ്യാപനത്തോടെ ടൂറിസം രംഗം ഇല്ലാത്തതിനാൽ പ്രതിസന്ധിയിലായ ഇവർക്ക് ഇതിനു പുറമെ സഊദിയിലേക്കുള്ളതും പുറത്തേക്കുള്ളതുമായ മുഴുവന്‍ സര്‍വീസുകളും റദ്ദ് ചെയ്തതോടെ ഉപഭോക്താക്കള്‍ക്ക് ടിക്കറ്റ് തുക ഒരുമിച്ച് തിരിച്ചു നല്‍കേണ്ട അവസ്ഥായാണിപ്പോള്‍. ഇത് ഇവർക്ക് ഏറെ പ്രതിസന്ധിയാണ് സൃഷ്ടിക്കുന്നത്. ദിനേന നൂറുകണക്കിന് പേര്‍ ടിക്കറ്റുകളും ബിസിനസ് വിസകളും ടൂറിസം പാക്കേജുകളും വാങ്ങുന്നതിനായി എത്തിയിരുന്ന ട്രാവല്‍സുകളില്‍ ഇപ്പോള്‍ ടിക്കറ്റ് തുക തിരികെ നല്‍കുന്ന ജോലി മാത്രമാണ് നടന്നു വരുന്നത്. വിമാന കമ്പനികള്‍ തിരികെ നല്‍കുന്ന ടിക്കറ്റ് തുകയിലും അവ്യക്തത നിലനില്‍ക്കുന്നതിനാൽ ഉപഭോക്താക്കള്‍ക്ക് ഇത് സംബന്ധിച്ച മറുപടി നൽകിയും ഇവർ കുഴങ്ങിയിട്ടുണ്ട്.
    അതേസമയം, ഇതേ അവസ്ഥയിൽ നിയന്ത്രണങ്ങൾ നീണ്ടു പോയാൽ ഹോട്ടൽ, ട്രാവൽ ടൂറിസം മേഖല പൂർണ്ണമായും തകരുമെന്നാണ് പലരും വിലയിരുത്തുന്നത്. തകർച്ച നേരിടുന്ന പല ബിസിനസ് മേഖലകളും ജീവനക്കാര്‍ക്ക് നിര്‍ബന്ധിത അവധിയുള്‍പ്പെടെ നല്‍കി പ്രതിസന്ധി മറികടക്കാനുള്ള ഒരുക്കത്തിലാണിപ്പോള്‍.