ദമാം: നടപ്പാതയിൽ നിന്ന് വീണു കിട്ടിയ വൻ തുക പോലീസിനെ ഏൽപ്പിച്ചു മാതൃകയായ മലയാളി യുവാവിനെ ആദരിച്ചു. കിഴക്കൻ പ്രവിശ്യയിലെ അൽഹസയിൽ വെച്ചാണ് വീണുകിട്ടിയ പത്തൊൻപതിനായിരം റിയാൽ സഊദി പൊലീസിന് കൈമാറി യുവാവ് മാതൃകയായത്. സത്യസന്ധതക്ക് മാതൃക കാട്ടിയ സുൽഫിക്കറിനെ നവയുഗം സാംസ്ക്കാരിക വേദി ഉപഹാരം നൽകി ആദരിച്ചു. പ്രഭാത സവാരിക്കിടെ പത്തൊമ്പതിനായിരം റിയാൽ (മൂന്നേമുക്കാൽ ലക്ഷത്തോളം രൂപ) അടങ്ങുന്ന ബാഗാണ് സുൽഫിക്കറിന് വീണു കിട്ടിയത്. ഉടനെത്തന്നെ അൽ ഹസയിലെ ജീവകാരുണ്യ പ്രവർത്തകനായ നാസർ മദനിയെ വിളിച്ചു വരുത്തി ഒരുമിച്ച് പോലീസ് സ്റ്റേഷനിൽ ചെന്ന അദ്ദേഹം പണമടങ്ങിയ ബാഗ് പോലീസ് അധികാരികൾക്ക് കൈമാറുകയായിരുന്നു. സുൽഫിക്കറിന്റെ സത്യസന്ധതയെ പോലീസ് അധികാരികളും അഭിനന്ദനമറിയിച്ചു.
     വിവരം അറിഞ്ഞതിനെത്തുടർന്ന് പ്രവാസി സാമൂഹ്യ മേഖലകളിലെ പ്രമുഖർ അടക്കം ഒട്ടേറെ പേരാണ് സുൽഫിക്കറിനെ അഭിനന്ദനം അറിയിച്ചത്. നവയുഗം അൽഹസ മേഖലകമ്മിറ്റി അംഗവും മസറോയിയ യൂണിറ്റ് ഭാരവാഹികളിൽ ഒരാളുമാണ് സുൽഫിക്കർ. സഊദി പോലീസിന്റെയും പ്രവാസി സമൂഹത്തിന്റെയും പ്രശംസ നേടി മലയാളികളുടെ അഭിമാനമായി മാറിയ സുൽഫിക്കറിന് സത്യസന്ധതയ്ക്കുള്ള അംഗീകാരമായാണ് നവയുഗം മസറോയിയ യൂണിറ്റിന്റെ ആഭിമുഖ്യത്തിൽ ഉപഹാരം നൽകി ആദരിച്ചത്.
മസാറോയിയ ഓഫീസിൽ നടന്ന യോഗത്തിൽ യൂണിറ്റ് പ്രസിഡൻ്റ എകെ നാസർ അധ്യക്ഷത വഹിച്ചു. മേഖല രക്ഷാധികാരി സുശീൽ കുമാർ ഉദ്ഘാടനം ചെയ്‌തു. സത്യസന്ധതക്കുള്ള നവയുഗത്തിന്റെ ഉപഹാരം അൽഹസ മേഖല സെക്രട്ടറി ഇഎസ് റഹിം തൊളിക്കോട് സുൽഫിക്കറിന് സമ്മാനിച്ചു. കേന്ദ്ര കമ്മിറ്റി അംഗം അബ്‌ദുൽ കലാം, അമീർ, റഷീദ് കോഴിക്കോട് തുടങ്ങിയവർ സംസാരിച്ചു. യൂണിറ്റ് രക്ഷാധികാരി ബദർ കുളത്തുപ്പുഴ നേതൃത്വം നൽകി. യൂണിറ്റ് സെക്രട്ടറി സജീദ് തൊളിക്കോട് സ്വാഗതവും ഷീഹാബുദ്ദീൻ നന്ദിയും രേഖപ്പെടുത്തി.