റിയാദ്: സ്‌ഫോടക വസ്‌തുക്കൾ നിറച്ച് ആക്രമണത്തിന് തയ്യാറായ രണ്ടു ബോട്ടുകൾ തകർത്തതായി യമനിൽ യുദ്ധത്തിലേർപ്പെട്ട സഊദി അറേബ്യായുടെ നേതൃത്വത്തിലുള്ള അറബ് സഖ്യ സേന അറിയിച്ചു. യമനിലെ വിമത വിഭാഗമായ ഇറാൻ അനുകൂല ഹൂതികൾ ആക്രമണത്തിനായി തയാറാക്കിയ ആയുധ ബോട്ടുകളാണ് തകർത്തത്. ഹൂതികളുടെ നിയന്ത്രണത്തിലുള്ള ഹുദൈദ തുറമുഖത്ത് നിന്നും റിമോട്ട് കൺട്രോൾ ഉപയോഗിച്ചാണ് ആയുധ ബോട്ടുകൾ നിയന്ത്രിച്ചിരുന്നതെന്ന് അറബ് സഖ്യ സേനയെ ഉദ്ധരിച്ച് സഊദി വാർത്താ ഏജൻസി റിപ്പോർട്ട് ചെയ്‌തു. ഇന്ത്യൻ ഉൾക്കടലിനും ചെങ്കടലിലും ഇടയിൽ ബന്ധിപ്പിക്കുന്ന ബാബ് അൽ മൻദബ് കപ്പൽ പാതയിൽ ഭീഷണിയായാണ് ആയുധ ബോട്ടുകൾ നീങ്ങിയിരുന്നതെന്ന് അറബ് സഖ്യ സേന വക്താവ് അറിയിച്ചു.