കൊച്ചി: വിവാഹ രജിസ്‌ട്രേഷന്‍ നിയമം ഭേദഗതി ചെയ്യണമെന്നാവശ്യപ്പെട്ട് മുഖ്യമന്ത്രിക്ക് നിവേദനം. മക്കള്‍ വിവാഹ രജിസ്‌ട്രേഷന് അപേക്ഷ നല്‍കിയാല്‍ മാതാപിതാക്കള്‍ക്ക് അതറിയാനുള്ള സംവിധാനം ഒരുക്കണമെന്നാണ് ആവശ്യം.
വിവാഹ രജിസ്‌ട്രേഷന്‍ നിയമത്തിലും നടപടിക്രമങ്ങളിലും ഇത്തരത്തില്‍ ഭേദഗതി വരുത്തണമെന്നാവശ്യപ്പെട്ട് കോതമംഗലം സ്വദേശി എം.യു.അഷ്‌റഫ് ആണ് മുഖ്യമന്ത്രിയെ സമീപിച്ചത്.

വിവാഹ രജിസ്‌ട്രേഷന്‍ നടപടിക്രമങ്ങളില്‍ രജിസ്‌ട്രേഷനായി മക്കള്‍ അപേക്ഷ നല്‍കിയിട്ടുണ്ടോ എന്നറിയാന്‍ വീട്ടുകാര്‍ക്ക് ഒരു മാര്‍ഗവുമില്ല. ഇതിന് പരിഹാരം കാണണമെന്നും അപേക്ഷകള്‍ സ്വീകരിച്ച രജിസ്ട്രാര്‍ ഓഫിസുകളില്‍ നോട്ടിസ് പ്രസിദ്ധീകരിക്കുന്നതിനൊപ്പം അപേക്ഷകരുടെ വീടുകളിലേക്കും അത് അയക്കണമെന്നുമാണ് ആവശ്യം.
വിവാഹ രജിസ്‌ട്രേഷന്‍ വിവരം മാതാപിതാക്കളെ അറിയിച്ച് 14 ദിവസത്തിന് ശേഷം മാത്രമെ നടപടിക്രമങ്ങളുമായി മുന്നോട്ടുപോകാന്‍ പാടുള്ളുവെന്നും വീഴ്ചയുണ്ടാകുന്ന പക്ഷം നടപടിക്രമങ്ങളും രജിസ്‌ട്രേഷനും അസാധുവാക്കണമെന്നുമാണ് ആവശ്യമെന്ന് അഷ്‌റഫ് വാര്‍ത്ത സമ്മേളനത്തില്‍ പറഞ്ഞു.
വരും ദിവസങ്ങളില്‍ കോടതിയെ സമീപിക്കാനാണ് തീരുമാനമെന്നും അദ്ദേഹം കൂട്ടിച്ചേര്‍ത്തു.