ആലുവ: കോളനിപ്പടിയില്‍ എക്‌സൈസ് സംഘം നടത്തിയ റെയ്ഡില്‍ വന്‍ മയക്കുമരുന്ന് സംഘത്തെ പിടികൂടി. കോളനിപ്പടിയിലെ വീട്ടില്‍ നിന്നും ഉടമ ഉള്‍പ്പടെ അഞ്ച് പേരേ എക്‌സൈസ് റേഞ്ച് ഇന്‍സ്‌പെക്ടര്‍ ആര്‍. പ്രശാന്തും സംഘവും പിടികൂടി. ഇവരുടെ കൈവശത്തില്‍ നിന്നും 125 മയക്കുമരുന്ന് ഗുളികകളും (നൈട്രേസെപാം) 50 ഗ്രാം കഞ്ചാവും കണ്ടെടുത്തു.
വീട്ടുടമ പുത്തന്‍പുരയ്ക്കല്‍ ഷാജി, എടയപ്പുറം മനയ്ക്കത്താഴത്ത് വീട്ടില്‍ പ്രഹ്ലാദന്‍, ചുണങ്ങംവേലി മാഞ്ഞൂരാന്‍ വീട്ടില്‍ ജോസ് , മേത്തല തിരുവഞ്ചിക്കുളം തെരുവില്‍ വീട്ടില്‍ സജ്മല്‍ (23), കൊടുങ്ങല്ലൂര്‍ ചള്ളിയില്‍ വീട്ടില്‍ ശ്രീദര്‍ശ് എന്നിവരാണ് അറസ്റ്റിലായത്.
പ്രതികള്‍ മയക്കുമരുന്ന് കടത്താന്‍ ഉപയോഗിച്ച രണ്ട് ബൈക്കുകളും കസ്റ്റഡിയില്‍ എടുത്തിട്ടുണ്ട്. പ്രിവന്റീവ് ഓഫീസര്‍ കെ.റ്റി സാജു, സിവില്‍ എക്‌സൈസ് ഓഫിസര്‍മാരായ ബി. മുരളി, എം.കെ. ഷാജി, എ.ഇ. സിദ്ധിക്, എം.എ. ഷിബു, സിയാദ് എ, ഡ്രൈവര്‍ സക്കീര്‍ ഹുസൈന്‍ എന്നിവര്‍ പങ്കെടുത്തു. പ്രതികളെ ആലുവ ജുഡീഷ്യല്‍ ഒന്നാം ക്ലാസ്സ് മജിസ്‌ട്രേറ്റ് കോടതി മുമ്പാകെ ഹാജരാക്കി റിമാന്റ് ചെയ്തു. ആലുവ കേന്ദ്രീകരിച്ച് കഞ്ചാവ് മയക്കുമരുന്ന് മാഫിയയുടെ പ്രവര്‍ത്തനത്തെ ശക്തമായി നേരിടുമെന്ന് എക്‌സൈസ് ഇന്‍സ്‌പെക്ടര്‍ അറിയിച്ചു.