ചേലേമ്പ്ര (ടി.കെ.എം ബാവ മുസ്‌ലിയാര്‍ നഗര്‍ പുല്ലിപ്പറമ്പ്): കലകള്‍ പ്രോത്സാഹിപ്പിക്കപ്പെടേണ്ടതാണെന്നും ഇസ്‌ലാമിക കലകളെ അനിസ്‌ലാമികമാക്കാന്‍ ശ്രമിക്കരുതെന്നും സയ്യിദ് മുഹമ്മദ് കോയ തങ്ങള്‍ ജമലുല്ലൈലി പറഞ്ഞു.
ഇസ്‌ലാമിക തനത് കലകളെ അനിസ്‌ലാമികമാക്കിയും അനിസ്‌ലാമിക കലകളെ ഇസ്‌ലാമിക കലകളാക്കിയും ചിത്രീകരിക്കാനുള്ള ശ്രമം നടന്നുവരുന്നതായും ഇക്കാര്യത്തില്‍ സമൂഹം ജാഗ്രത പാലിക്കണമെന്നും തങ്ങള്‍ ഓര്‍മിപ്പിച്ചു. എസ്.കെ.ജെ.എം മലപ്പുറം വെസ്റ്റ് ജില്ലാ ഇസ്‌ലാമിക കലാമേള ചേലേമ്പ്ര പുല്ലിപ്പറമ്പ് തഅ്‌ലിമുല്‍ ഉലൂം ഹയര്‍ സെക്കന്‍ഡറി മദ്‌റസയില്‍ ഉദ്ഘാടനം ചെയ്തു സംസാരിക്കുകയായിരുന്നു തങ്ങള്‍.
എസ്.കെ.ജെ.എം 60ാം വാര്‍ഷികത്തോടനുബന്ധിച്ചു ജില്ലാ മുഅല്ലിം പ്രബന്ധ മത്സരത്തിലെ വിജയികള്‍ക്കുള്ള അവാര്‍ഡ് ദാനവും തങ്ങള്‍ നിര്‍വഹിച്ചു. മഹല്ല് പ്രസിഡന്റ് അബ്ദുല്‍ ഖാദര്‍ ഹാജി പതാക ഉയര്‍ത്തി. ജില്ലാപഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ മുഖ്യാതിഥിയായി. ടി. മൊയ്തീന്‍ മുസ്‌ലിയാര്‍ പുറങ്ങ് അധ്യക്ഷനായി. ടി. മുഹമ്മദ് അനസ് ഫൈസി പ്രര്‍ഥനയ്ക്കു നേതൃത്വം നല്‍കി. കെ.കെ.എസ് തങ്ങള്‍ വെട്ടിച്ചിറ, കെ.എം കുട്ടി എടക്കുളം, എന്‍.ടി.എം കുട്ടി മൗലവി, പി.കെ അബ്ദുല്‍ ഖാദിര്‍ അല്‍ ഖാസിമി, പി.കെ അബൂബക്കര്‍ ഹാജി, എന്‍.കെ അബ്ദുന്നാസര്‍, കുഞ്ഞാലന്‍ കുട്ടി മുന്‍ഷി, എ.പി അബ്ദുര്‍റാഫിഹ് ഫൈസി, കെ. കുഞ്ഞാലന്‍ കുട്ടി എന്ന ബാവ ഹാജി, അഷ്‌റഫ് മലയില്‍, അഷ്‌റഫ് മുസ്‌ലിയാര്‍, മുസ്തഫ ദാരിമി, ഹുസൈന്‍ ദാരിമി, നൗഷാദ് ചെട്ടിപ്പടി, അനീസ് ഫൈസി മാവണ്ടിയൂര്‍ സംസാരിച്ചു.