പെരുങ്ങോട്ടുകുറുശ്ശി: നിര്‍ധനരും നിരാലംഭരുമായ മൂന്ന് യുവതികള്‍ക്ക് മംഗല്യ സൗഭാഗ്യമൊരുക്കി പെരുങ്ങോട്ടുകുറുശ്ശി സാധുസംരക്ഷണ റിലീഫ് കമ്മിറ്റി സംഘടിപ്പിച്ച സമൂഹ വിവാഹ സദസ് മാതൃകയായി. പിലാപ്പുള്ളി ത്രീസ്റ്റാര്‍ ഓഡിറ്റോറിയത്തില്‍ നടത്തിയ സമൂഹവിവാഹത്തിന് എസ്.വൈ.എസ് സംസ്ഥാന വൈസ് പ്രസിഡന്റ് പി.കെ ഇമ്പിച്ചിക്കോയ തങ്ങള്‍ കാര്‍മികത്വം വഹിച്ചു. അനുബന്ധ സമ്മേളനം പി.കെ ഇമ്പിച്ചിക്കോയ തങ്ങള്‍ ഉദ്ഘാടനം ചെയ്തു. സാധു സംരക്ഷണ റിലീഫ് കമ്മിറ്റി പ്രസിഡന്റ് യൂസഫ് അക്കരപ്പറമ്പില്‍ അധ്യക്ഷനായി.
പഞ്ചായത്ത് പ്രസിഡന്റ് എ.വി ഗോപിനാഥ്, ഉബൈദുല്ല തങ്ങള്‍ ലക്കിടി, ഫ്ദലു റഹ്മാന്‍ ഹുദവി, ബ്ലോക്ക് പഞ്ചായത്തംഗം രതീഷ് ബാബു, പഞ്ചായത്തംഗം എം.എ ഭാസ്‌കരന്‍, ദയ ട്രസ്റ്റ് ചെയര്‍മാന്‍ ഇ.ബി രമേശ് തുടങ്ങിയവര്‍ സംസാരിച്ചു. സാധുസംരക്ഷണ റിലീഫ് കമ്മിറ്റി സെക്രട്ടറി ഷൗക്കത്തലി സ്വാഗതവും ട്രഷറര്‍ ഇബ്രാഹിം കുട്ടി തോട്ടു മുക്ക് നന്ദിയും പറഞ്ഞു. യുവതികള്‍ക്ക് അഞ്ചു പവന്‍ വീതം സ്വര്‍ണാഭരണവും, വിവാഹ വസ്ത്രവും വിവാഹസദ്യയും ഒരുക്കിയിരുന്നു.